لاہور(نیوز ڈیسک ) پاکستان مسلم لیگ (ن)کے رہنما احسن اقبال نے کہا ہے کہ اگر شہبازشریف یا نواز شریف کی صحت کو کوئی نقصان ہوا تو اس کے براہ راست ذمہ دار وزیراعظم ہوں گے،حکومت کے ہتھکنڈوں کا اچھی طرح مقابلہ کرنا جانتے ہیں، عمران کے خاندان کی کرپشن کی داستانیں سامنے آرہی ہیں، حکومت نے دوائیوں کی قیمتوں میں اضافہ کیا اسکی شدید مذمت کرتے ہیں۔ ہفتہ کو کوٹ لکھپت جیل
لاہور کے باہر میڈیا سے بات چیت کرتے احسن اقبال نے کہا کہ عمران خان جعلی مینڈیٹ کے ذریعے پاکستان سے انتقام لے رہے ہیں، مہنگائی عروج پر پہنچ گئی ہے، حکومتی پالیسیوں کی وجہ سے سرمایہ کارراہ فراراختیارکرچکے ہیں،عمران خان کے خاندان کی کرپشن کی داستانیں سامنے آرہی ہیں۔ انہوں نیکہاکہ پہلے تین سو اور اب پانچ سو ارب کی کٹوتی ہوگی،پانچ سے سات لاکھ افراد بے روزگار ہوچکے ہیں۔انہوں نے کہا کہ حکومت سارا زور انتقامی کارروائیوں پر لگارہی ہے،نوازشریف نے ملک سے اندھیرے ختم کئے۔انہوں نے مزید کہا کہ 13ارب لگاکر 9ارب اکٹھا کیا گیا، انہوں نے چیف جسٹس سے جے آئی ٹی تشکیل دینے کا مطالبہ کیا جوسیلاب فنڈ کی تحقیق کرے۔احسن اقبال نے کہا کہ حکومت سیلاب فنڈ سے ایک لاکھ مکان کہاں بنائے گی،جعلی مینڈیٹ والے لوگ ن لیگ سے انتقام لے رہے ہیں،ملکی معیشت کو موجودہ دورحکومت میں شدید نقصان ہوا۔احسن اقبال نے کہا کہ حکومت ہوش کے ناخن لے، ہم حکومت کے ہتھکنڈوں کا اچھی طرح مقابلہ کرنا جانتے ہیں، شہباز شریف اور نواز شریف کی صحت کو کوئی نقصان ہوا تو اس کے براہ راست ذمہ دار وزیراعظم، سیکریٹری داخلہ اور جیل سپرنٹنڈنٹ ہوں گے۔ حکومت نے دوائیوں کی قیمتوں میں اضافہ کیا اسکی شدید مذمت کرتے ہیں۔واضح رہے کہ احسن اقبال نے 13ارب روپے لگا کر 9ارب روپے اکٹھا کرنے
کا دعویٰ ڈیمز فنڈ کے حوالے سے کیا ہے جس کا انکشاف دو روز قبل سپریم کورٹ میں ایک خاتون اینکر کی جانب سے ڈیمز ٹھیکے کے حوالے سے غلط اعدادشمار پیش کرنے کے حوالے سے سماعت کے دوران ہوا۔ کیس کی سماعت چیف جسٹس کررہے تھے۔ عدالت کو بتایا گیا کہ ٹی وی چینل نے ڈیمز فنڈکیلئے اشتہارات چلائے ہیں جن کی اوقات کار کو مجموعی طور پر جمع کیا جائے تو اس کی رقم 13ارب روپے بنتی ہے۔ سابق وفاقی وزیر داخلہ احسن اقبال کا اشارہ بھی اسی جانب تھا۔
