لاہور (نیوز ڈیسک) پاک زمبابوے کھلاڑیوں کے بیٹ اور بال کا تال میل آج رنگ جمائے گا ، اس سے پہلے موسم کیا منظر بتائے گا اور وکٹ اب کیا اثر دکھائے گا سب اہم ہے۔ ہر سو پاک زمبابوے کرکٹ کے چرچے ہیں آج کے دلچسپ میچ کے موسم پر بات کی جائے تو شائقین کی طرح وہ بھی خاصی گرم جوشی کا مظاہرہ کرنے والا ہے۔ کرکٹ کے بخار نے لاہور کے موسم کو مزید گرم رکھنے کی نوید سنا دی ہے جہاں آج کا موسم اپنی پوری آب و تاب دکھائے گا وہیں سورج بھی بھر پور لشکارے مارے گا۔ آج درجہ حرارت زیادہ سے زیادہ 43 ڈگری رہے گا جبکہ شام کے وقت شیڈول پاک زمبابوے میچ کے دوران 20 درجہ کمی کے ساتھ اپنی موجودگی کا احساس دلائے گا۔ قذافی سٹیڈیم کی وکٹ کو بیٹنگ کے لیے فیورٹ قرار دیا جا رہا ہے ، چھ سال سے یہی پچ صرف ڈومیسٹک ایونٹس کے لیے استعمال ہوتی رہی ہے مگر انٹرنیشنل کرکٹ کے لیے آج بھی ہری بھری ہے۔ پاکستان میں کرکٹ ٹمپریچر کی حدت اور شدت کا اندازہ اس بات سے لگایا جاسکتا ہے کہ میچ سے 2 دن قبل ہی ہاو¿س فل ہو گیا۔ ساٹھ ہزار شائقین کی گنجائش رکھنے والا یہ سٹیڈیم کرکٹ مداحوں کے جوش سے آج لبریز ہو گا۔