لاہور ( این این آئی)گورنر پنجاب چوہدری محمد سرور نے کہا ہے کہ کوئی کسی کی حکومت نہیں گرارہا ،ہم آئینی اور جمہوری اقدار کو قائم رکھیں گے،صاف پانی کی فراہمی کے لئے پنجاب صاف پانی اتھارٹی بن رہی ہے،اگلے پانچ سالوں میں صوبے کی پوری آبادی کو صاف پانی ملے گا،اپنے ناکامیوں سے سبق سیکھ رہے ہیں،لوڈشیڈنگ میں کمی ، کلین گرین پاکستان ہمارا خواب ہے۔ان خیالات کا اظہار انہوں نے کنگ ایڈورڈ کے مقبول احمد بلاک کا سنگ بنیاد رکھنے کے بعد میڈیا سے گفتگو کرتے ہوئے کیا ۔

چوہدری محمد سرور نے  کہا کہ پاکستانیوں کا دل بہت بڑا ہے، ڈیم فنڈ میں اربوں روپے اکٹھے ہوگئے ہیں ۔صاف پانی کی فراہمی کیلئے پنجاب صاف پانی اتھارٹی بن رہی ہے، پورے پنجاب میں موپنگ کر رہے ہیں کہ کتنے فلٹریشنز کام کر رہے ہیں اور کتنے نہیں۔اگلے 5سالوں میں پورے پنجاب کو صاف پانی ملے گا۔انہوں نے مسکراتے ہوئے کہا کہ جیل میں نوازشریف اور شہباز شریف کو بھی صاف پانی مل رہا ہے ۔خواتین کو جیلوں میں ہنر سکھا رہے ہیں ،پولیس لائینز میں ہیپاٹائٹس کی سکریننگ کر رہے ہیں۔