اسلام آباد (این این آئی) بالی ووڈ اداکاروں شاہ رہ خان وکاجول سے ملنے بھارت جانیوالا ان کا مداح قید کاٹنے کے بعد واپس پاکستان پہنچ گیا۔میڈیا رپورٹ کے مطابق خیبرپختونخوا کے علاقے ضلع سوات کی تحصیل مینگورہ کا رہائشی 21 سالہ عبداللہ مئی 2017ء واہگہ بارڈر کے راستے بھارت میں داخل ہوا تھا ۔ بھارت میں داخل ہوتے ہی عبداللہ سواتی کو بھارتی فورسز نے حراست میں لیکر جیل منتقل کردیا تھا۔

وطن واپسی پر نجی ٹی وی سے گفتگو کرتے ہوئے عبداللہ سواتی نے بتایا کہ میں بالی ووڈ اداکاروں شاہ رخ خان اور کاجول کا بہت بڑا مداح ہوں ۔ انہوں نے کہا کہ میں نے ان سے ملنے کیلئے دوسری بار بھارت میں داخل ہونے کی کوشش کی اور ایک بار پھر ان سے ملنے کیلئے بھارت جاؤنگا۔ انہوں نے کہا کہ جب میں واہگہ کے راستے بھارت میں داخل ہوا تو بھارتی اہلکار نے تنبیہ کی کہ وہ واپس چلا جاؤں ورنہ وہ مجھے گولی مار دینگے ۔عبداللہ نے بتایا کہ میں نے بھارتی اہلکار کی ایک بات نہ سنی اور انہیں بتایا کہ میں شاہ رخ خان سے ملنا چاہتا ہوں ، تاہم پھر بھی اہلکار انہیں گولی چلانے کی دھمکیاں دیتا رہا، تاہم بعد ازاں اپنے دوسرے ساتھی کے کہنے پر مجھے گرفتار کرکے امرتسر جیل بھیج دیا گیا۔21 سالہ نوجوان نے بتایا کہ امر تسر میں 50 کے قریب پاکستانی قیدی تھے، جن میں سے زیادہ تر افراد نے غلطی سے بھارتی سرحد پار کرلی تھی۔شاہ رخ خان اور کاجول کے مداح نے کہا کہ جب تک میرا بچپن کا سپنا سچ نہیں ہوتا، میں بھارت میں داخل ہونے کی کوشش کرتا رہونگا۔ عبداللہ نے بتایا کہ میں نے پہلے اسلام آباد میں موجود سفارتخانے کو بھارتی ویزے کی درخواست کی تھی وہ مسترد ہونے کے بعد میں نے غیر قانونی طور سے بھارت جانے کا منصوبہ بنایا۔عبداللہ سواتی نے بتایا کہ بھارت میں قید میں رہتے ہوئے مجھے لگا تھا کہ میں کبھی بھی آزاد نہیں ہو پاؤنگاتاہم جب مجھے رہائی سے متعلق پتہ چلا تو وہ بے حد خوش ہوا اور وہاں قید پاکستانیوں نے میرے کیلئے ایک پارٹی منعقد کی۔واضح رہے کہ کاجول اور شاہ رخ خان کا مداح امرتسر جیل میں 19 ماہ گزارنے کے بعد وطن پہنچا ہے ۔