اسلام آباد(آئی این پی)وزیر اعظم کے معاون خصوصی برائے احتساب بیرسٹر شہزاد اکبر نے کہا ہے کہ آصف زرداری کے خلاف پوری چارج شیٹ آگئی ہے،جے آئی ٹی حکومت نے نہیں بلکہ سپریم کورٹ نے بنائی ہے ، اگر اپوزیشن جے آئی ٹی بنوانا چاہتی ہے
تو عدالت جائے اور پٹیشن دائر کرے ، اگر کوئی ثابت کر دے کہ مجھے جج نے نکالا تھا تو مستعفی ہو جاؤں گا ۔ وہ منگل کو نجی ٹی وی سے گفتگو کر رہے تھے ۔ انہوں نے کہا کہ علیمہ خان نے سرکاری عہدہ کبھی نہیں رکھا ، آصف زرداری کے خلاف پوری چارج شیٹ آگئی ہے ، جے آئی ٹی حکومت نے نہیں بلکہ سپریم کورٹ نے بنائی ہے ، جے آئی ٹی اس لئے بنائی گئی تا کہ معاملے کی طے تک پہنچا جائے ، پانامہ کی جے آئی ٹی بھی پی ٹی آئی پٹیشن پر سپریم کورٹ نے بنائی ، اگر اپوزیشن جے آئی ٹی بنانا چاہتی ہے تو عدالت جائے اور پٹیشن دائر کرے ۔شہزاد اکبر نے کہا کہ جے آئی ٹی سے میں نہیں ملا اور اس حوالے سے کئی بار تردید کر چکا ہوں ، اگر میرے خلاف جے آئی ٹی سے تعلق کا الزام لگا رہے ہیں تو ثبوت بھی لے کر آئیں ، جعلی اکاؤنٹس پر جے آئی ٹی سپریم کورٹ کے حکم پر بنائی گئی ۔انہوں نے کہا کہ اگر کوئی ثابت کر دے کہ مجھے جج نے نکالا تھا تو مستعفی ہو جاؤں گا ،عدالت سے باہر نکالا جانا ثابت کریں تو ملک چھوڑ دوں گا ، مجھے جج باہر کیوں نکالیں گے میں خود ایک وکیل ہوں ۔
