لاہور( این این آئی)سپریم کورٹ نے پی آئی اے سمیت نجی ائیر لائنز کے پائلٹس اور کیبن کریو کی ڈگریوں کی 28دسمبر تک تصدیق کا حکم دیدیا ۔چیف جسٹس میاں ثاقب نثار کی سربراہی میں دو رکنی بینچ نے از خود نوٹس پر سماعت کی ۔ اس موقع سول ایوی ایشن کے حکام اور دیگر بھی موجود تھے۔سول ایو ی ایشن کے وکیل نے موقف اپنایا کہ بہت سے پائلٹس اور کیبن کریو کی فراہم کردہ ڈگریاںپڑھے جانے کے قابل نہیں ۔ جس پر چیف جسٹس نے ہدایت کی کہ جو واضح اور صاف ڈگریاں فراہم
نہ کرے اسے فارغ کر دیں۔ عدالت کو بتایا گیا کہ ملتان بورڈ نے تمام 161 افراد کی ڈگریوں کی تصدیق کر دی ہے،فیصل آباد بورڈ نے 89 ڈگریوں ،سرگودھا بورڈ نے 70 میں سے 26 افراد کی ڈگریوں کی تصدیق کر دی ہے۔سرگودھا بورڈ سے 39 افراد کی ڈگریوں کی تصدیق نہیں ہو سکی،5 افراد کے رول نمبرز غلط ہیں۔چیف جسٹس نے پی آئی اے سمیت نجی ائیر لائنز کے پائلٹس اور کیبن کریو کی ڈگریوں کی 28دسمبر تک تصدیق کا حکم دیتے ہوئے سماعت ملتوی کر دی۔