اسلام آباد (مانیٹرنگ ڈیسک)اسلام آبادکی احتساب عدالت کی جانب سے نیب ریفرنسز کا فیصلہ سنائے جانے سے قبل نوازشریف عباس آفریدی کے فارم ہاؤس پہنچ گئے، وکیل خواجہ حارث سے مشاورت، حمزہ شہباز اور دیگر رہنما بھی موجود۔ تفصیلات کے مطابق اسلام آباد کی احتساب عدالت العزیزیہ اور فلیگ شپ ریفرنسز کے فیصلے آج سنائے گی ۔ عدالت کے اندر اور باہر سکیورٹی کے

سخت انتظامات کئے گئے ہیں۔ جوڈیشل کمپلیکس کے باہر اور آس پاس آج ایک ہزار کے قریب اہل کار تعینات ہیں، کمرۂ عدالت میں نواز شریف کو کلوز پروٹیکشن یونٹ سیکیورٹی فراہم کرے گا۔نواز شریف کے خلاف ریفرنسز کے فیصلے کے موقع پر عدالت میں صرف 15افراد کے داخلے کی اجازت ہو گی، ہنگامی صورتِ حال سے نمٹنے کے لیے رینجرز بھی موجود رہے گی۔جوڈیشل کمپلیکس اور اطراف کے علاوہ بھی اسلام آباد کے داخلی اور خارجی راستوں پر اضافی پولیس فورس تعینات کی گئی ہے۔ایک بکتر بند گاڑی بھی اسلام آبادکی احتساب عدالت پہنچا دی گئی ہے جو عقبی راستے سے لائی گئی۔نواز شریف احتساب عدالت میں آج اپنے خلاف نیب ریفرنسز کا فیصلہ سننے خود جائیں گے۔ نواز شریف نے احتساب عدالت جانے سے پہلےصبح سویرے عباس آفریدی کے فارم ہاؤس پہنچے جہاں ان کی اپنے وکیل خواجہ حارث سے مشاورت ہوئی ہے۔ اس موقع پر ان کے بھتیجے اور پنجاب اسمبلی میں قائد حزب اختلاف حمزہ شہباز اور دیگر رہنما بھی موجود تھے۔ واضح رہے کہ گزشتہ روز نوازشریف اور شہبازشریف کی ملاقات کے دوران نون لیگی قیادت نے اتفاق کیا تھا کہ جو بھی فیصلہ آیا اس کے حوالے سے قانونی راستہ اختیار کیا جائے گا، فیصلہ خلاف آنے پر پارلیمنٹ کے اندر احتجاج کیا جائے گا۔اسلام آباد کی احتساب عدالت کی جانب سے آج سابق وزیر اعظم میاں نواز شریف کے خلاف العزیزیہ اور فلیگ شپ ریفرنسز کا فیصلہ سنائے جانے کے موقع پر مسلم لیگ نون کے رہنما جاوید ہاشمی، مریم اورنگزیب ، چوہدری تنویر و دیگر علی الصبح فیڈرل جوڈیشل کمپلیکس پہنچ چکے ہیں۔