لاہور ( آن لائن) پاکستان مسلم لیگ ن کی ترجمان مریم اورنگزیب نے نعیم الحق کے بیان پر شدید ردعمل دیتے ہوئے کہا ہے کہ عمران صاحب ہی اپنے ساتھ اور گھر میں چور بٹھا کر دوسروں پر چوری کا الزام لگا سکتے ہیں۔مسلم لیگ (ن) کی ترجمان مریم اورنگزیب نعیم الحق کے بیان پر برہم، کہتی ہیں نعیم الحق کی وجہ شہرت اور عمران خان کے ساتھ دوستی پورا پاکستان جانتا ہے، صرف عمران صاحب ہی اپنے ساتھ اور گھر میں چور بٹھا کر دوسروں پر چوری کا الزام لگا سکتے ہیں۔ انہوں نے کہا کہ عمران خان پی ٹی آئی کی اربوں روپے کی
منی لانڈرنگ، زکوۃ کے پیسوں میں خورد برد اور علیمہ خان کے اربوں روپے کی بیرون ملک خفیہ جائیدادوں کا جواب دیں۔ انہوں نے سوال کیا کہ جہانگیر ترین کی مسلمہ چوری اور فیصل واڈا کی غیر ظاہر کردہ غیر ملکی جائیدادوں پر عمران خان کیوں خاموش تماشائی ہیں؟ مریم اورنگزیب نے کہا کہ یہ کیسا احتساب ہے جو شہباز شریف کا میڈیکل تو روک سکتا ہے لیکن عمران خان سے ہیلی کاپٹر کا نہیں پوچھ سکتا؟ تین سال گزرنے کے باوجود نیب نواز شریف صاحب کے خلاف کسی بھی بدعنوانی، کرپشن اور کک بیکس کا الزام تک نہیں لگا سکی۔
