اسلام آباد (مانیٹرنگ ڈیسک) سابق وفاقی وزیر داخلہ چوہدری نثار علی خان وزیراعظم عمران خان کی حمایت میں کھل کر سامنے آ گئے، ایک نجی ٹی وی چینل سے گفتگو کرتے ہوئے چوہدری نثار نے کہا کہ پاکستان کی سیاست میدان جنگ کا نقشہ پیش کر رہی ہے،
انہوں نے کہا کہ موجودہ صورتحال پاکستان کی ترقی، خوشحالی، استحکام اور مستقبل کے لیے زہر قاتل ہے، چوہدری نثار نے کہا کہ اپوزیشن کو سانس لینے کے لیے حکومت موقع دے جبکہ حکومت کو کارکردگی دکھانے کے لیے اپوزیشن کو چاہیے کہ وہ موقع دے،سیاسی جماعتوں کو نام نہاد احتساب کے ذریعے ختم نہیں کیا جا سکتا۔ چوہدری نثار نے امریکہ طالبان مذاکرات کے بارے گفتگو کرتے ہوئے کہا کہ یہ ایک مثبت پیش رفت ہے، امریکہ طالبان مذاکرات پر پاکستان کو بلاجواز کریڈٹ لینے سے گریز کرنا چاہیے، معاملے پر پیشرفت نہ ہونے سے یہ صورتحال پاکستان کے گلے پڑ سکتی ہے، سابق وزیر داخلہ نے کہا کہ پاکستان نے تمام فریقین کو ایک میز پر لانے کے لیے پہلی بار کردار ادا نہیں کیا، اڑھائی سال قبل مری مذاکرات اس سلسلہ کی کڑی تھے، چوہدری نثار نے کہا کہ حکومت بھارت کے منتیں ترلے کرنے کے باوجود اسے مذاکرات کی میز پر نہیں لاسکی، مودی کے ضمیر میں پاکستان سے دوستی شامل نہیں ہے، سابق وزیر داخلہ چوہدری نثار علی خان نے عمران خان کے ٹرمپ کے بیان پر ردعمل دینے پر اسے درست اور مثبت قدم کہا، انہوں نے کہا کہ عمران خان کی بھارت سے یکطرفہ تعلقات کی بحالی کے لیے کوششیں پاکستان اور عوام کی عزت نفس سے متضاد ہے۔ چوہدری نثار نے کہا کہ پاکستان کی سیاست میدان جنگ کا نقشہ پیش کر رہی ہے، انہوں نے کہا کہ موجودہ صورتحال پاکستان کی ترقی، خوشحالی، استحکام اور مستقبل کے لیے زہر قاتل ہے
