پرتھ(آئی این پی) بھارت اور آسٹریلیا کے درمیان کھیلے گئے پرتھ ٹیسٹ میں آسٹریلوی اسپنر نیتھن لیون نے ایک منفرد ریکارڈ اپنے نام کرلیا۔تفصیلات کے مطابق نیتھن لیون نے بھارت کیخلاف پرتھ ٹیسٹ کی پہلی اننگز میں 5وکٹیں اڑا کر ساتویں مرتبہ برصغیر کی کسی ٹیم کے خلاف
5وکٹیں حاصل کیں۔برصغیر کی ٹیموں کے خلاف شاندار کارکردگی کی بدولت انہوں نے ٹیسٹ کرکٹ کی تاریخ کے سب سے کامیاب سری لنکا کے جادوگر اسپنر بولر مرلی دھرن کا ریکارڈ بھی برابر کردیا۔ ٹیسٹ کرکٹ میں 800وکٹیں حاصل کرنے والے مرلی دھرن نے یہ کارنامہ 32میچوں میں انجام دیا تھا جبکہ نیتھن لیون نے محض 30میچوں میں اس کارنامے کو انجام دیا۔ نیتھن لیون کی اس شاندار کارکردگی پر سچن ٹنڈولکر نے بھی تعریفوں کے پل باندھ دیئے، ایک ٹویٹ میں ان کا کہنا تھا کہ کینگروز کو لیون کی شکل میں ایک بہترین اسپنر مل چکا ہے۔ سچن کی اس ٹویٹ پر نیتھن لیون نے خوشی کا اظہار کرتے ہوئے کہا کہ ٹنڈولکر کی جانب سے اس قسم کا ردعمل میرے لئے بہت خاص ہے۔واضح رہے نیتھن لیون نے پہلی اننگز میں 67 رنز کے عوض 5 بھارتی کھلاڑیوں کو چلتا کیا تھا جبکہ دوسری اننگز میں بھی انہوں نے 3 شکار کئے اور کینگروز کی جیت میں اہم کردار ادا کیا۔
