راس الخیمہ(سی پی پی )راس الخیمہ میں مختلف عدالتی معاملات میں ملوث افراد کے لیے بڑی سہولت دے دی گئی ہے۔ اب رہائشی ذیلی عدالتوں کی جانب سے سنائے گئے فیصلوں کے خلاف آن لائن اپیل کر سکتے ہیں۔ کیونکہ اپیل کورٹ کی جانب سے نئی الیکٹرانک سروس کا اجرا کرد یا گیا ہے۔ یہ سروس راس الخیمہ کورٹس اور راس الخیمہ ای گورنمنٹ اتھارٹی کے درمیان ایک معاہدے کے تحت شروع کی گئی ہے۔اس حوالے سے راس الخیمہ کورٹس کے چیئرمین احمد الخاطری نے بتایا کہ اس سروس کی بدولت وکلا حضرات کو اپنے موکلان
کی جانب سے فیصلوں کے خلاف اپیل درج کروانے میں بہت سہولت مِل جائے گی۔ اس اقدام کا مقصد انصاف کی فراہمی کے عمل کو تیز تر بنانا اور اسے جدید ٹیکنالوجی سے ہم آہنگ کرنا ہے۔راس الخیمہ ای گورنمنٹ اتھارٹی کے ڈائریکٹر جنرل احمد السیاح نے بتایا کہ آن لائن اپیلز ک باعث وکلا کا قیمتی وقت بچے گا اور ان کی جسمانی بھاگ دوڑ میں کمی آئے گی۔ایک وکیل سلام پپینیشری نے کہا کہ یہ اقدام بہت خوش آئند ہے ۔ امید ہے کہ یہ آن لائن نظام راس الخیمہ کی دیگر عدالتوں میں بھی جلد رائج کر دیا جائے گا۔
