لاہور (آن لائن)پی پی 168 میں دوبارہ ووٹوں کی گنتی کا عمل مکمل ہو گیا، ریٹرننگ افسر رحم زادہ نے دوبارہ ووٹوں کی گنتی کا نتیجہ جاری کر دیا۔ نتائج کے مطابق پاکستان تحریک انصاف کے امیدوار اسد کھوکھر کے 114 ووٹ مزید بڑھ گئے۔ غیر سرکاری اور غیر حتمی نتائج کے مطابق پی ٹی آئی امیدوار اسد کھوکھر 17571 ووٹ لیکر پہلے نمبر پر رہے اور مسلم لیگ (ن) کے امیدوار رانا خالد قادری 16870 ووٹ لے کر دوسرے نمبر پر رہے۔
دوبارہ گنتی کے لیے ریٹرننگ افسر کی ہدایت پر 33 پولنگ سٹیشن کے تھیلے کھولے گئے تھے۔ مسلم لیگ (ن) کے امیدوار رانا خالد قادری نے ووٹوں کی دوبارہ گنتی کیلئے درخواست جمع کروائی تھی جس میں موقف اختیار کیا گیا تھا کہ حلقے میں مسترد ووٹوں کی تعداد زیادہ ہے، اس لیے پی ٹی آئی امیدوار ملک اسد کھوکھر کی جیت کا نوٹیفکیشن ابھی جاری نہ کرتے ہوئے ووٹوں کی دوبارہ گنتی کروانے کا حکم دیا جائے۔ گزشتہ روز مسلم لیگ (ن) کے رہنما خواجہ سعد رفیق کی چھوڑی ہوئی نشست پی پی 168 لاہور میں ہونے والے ضمنی الیکشن میں تحریک انصاف کے امیدوار اسد کھوکھر 17 ہزار 579 ووٹ لے کر کامیاب قرار پائے تھے جبکہ (ن) لیگ کے رانا خالد 16 ہزار 892 ووٹ لیکر دوسرے نمبر پر رہے۔ پاکستان تحریک انصاف کے نومنتخب ممبرپنجاب اسمبلی پی پی168 ملک اسدعلی کھوکھرنے کہا ہے کہ حلقے کے ووٹرز کی محبت کامقروض اوران کاممنون ہوں،مسلسل پانچ برس تک ان کی انتھک خدمت سے بھی یہ قرض نہیں چکاسکتا۔ووٹرز سے مستقل رابطے میں رہوں گا،اب ہمار ی خوشی غمی سانجھی ہے۔ وزیراعظم عمران خان ،وزیراعلیٰ پنجاب سمیت پارٹی قیادت اورعوام کے اعتماد پرپورااتروں گا۔ووٹرز نے مجھے منتخب کرکے اپناکام ختم کردیا اور پی ٹی آئی کی کامیابی کے بعد ہماری جماعت کاکردارشروع ہوگیا ،اہلیان حلقہ کے ساتھ کئے انتخابی وعدے وفاکریں گے۔
ماضی کے حکمرانوں کی بدانتظامی وبدعنوانی سے بیزارعوام نے ووٹ کی پرچی سے گرینڈاپوزیشن کابینڈبجادیا۔پیپلزپارٹی اورمسلم لیگ (ن)کااتحاد نظریہ ضرورت کاشاخسانہ ہے ۔وہ مبارکباد پیش کرنے کیلئے آنیوالے مختلف وفودسے بات چیت کررہے تھے ۔ملک اسدعلی کھوکھر نے مزید کہا کہ اہلیان پی پی168نے وزیراعظم عمران خان کے ویژن پراعتماد کی مہرثبت کردی ۔ باشعور ووٹرز نے اپوزیشن کے منفی پراپیگنڈے کومستردکرتے ہوئے پی ٹی آئی کی سوروزہ اصلاحات کوپسندیدہ قراردیا۔
انہوں نے کہا کہ پاکستان کے عوام اپنے نیک نیت وزیراعظم عمران خان کی پشت پرکھڑے ہیں۔ اگر چوروں نے قوم کی پائی پائی واپس نہ کی تواسیری اوررسوائی ان کامقدربن جائے گی ۔انہوں نے کہا کہ وفاق سے پنجاب تک پی ٹی آئی حکومت سیاسی انتقام میں ملوث نہیں ہے ۔وزیراعظم عمران خان ملک میں آئین وقانون کی حکمرانی کے خواہاں ہیں۔انہوں نے کہا کہ قانون اورانصاف اپناراستہ خودبنارہے ہیں،ہماری حکومت قومی اداروں کے کام میں کسی قسم کی مداخلت کرے گی اورہمارے ہوتے ہوئے اپوزیشن بھی کسی ریاستی ادارے کوبلیک میل یامرعوب نہیں کرسکتی۔ماضی کے مقابلے میں آج نیب سمیت ریاستی ادارے پوری طرح آزاداورخودمختار ہیں۔ انہوں نے کہا کہ منی لانڈرنگ کاسدباب کئے بغیر قومی معیشت آئی سی یوسے باہر نہیں آسکتی۔
