دبئی(آئی این پی ) سیریز کے دوسرے ون ڈے میں گیند لگنے سے زخمی اوپنر امام الحق کے سٹی سکین سمیت تمام رپورٹس کلیئر آ گئیں، نیوزی لینڈ کے خلاف فیصلہ کن معرکہ میں شرکت کا حتمی فیصلہ فزیو ٹیم کی رپورٹ کے بعد ہی کیا جائے گا۔ تفصیلات کے مطابق ابوظہبی میں کیوی بولر لوکی فرگوسن کی گیند لگنے سے زخمی ہونے اور پھر ہسپتال پہنچ جانے والے امام الحق کی حوصلہ افزا رپورٹ آئی ہیں۔ شعیب ملک نے
امام الحق کے ساتھ تصویر ٹویٹر پر شیئر کی ہے جس میں انہوں نے کہا ہے کہ اوپنر امام الحق بالکل خیریت سے ہیں۔سیریز کے دوسرے ون ڈے میں 16 رنز پر کھیلتے ہوئے 22 سالہ اوپنر کیوی بولر کی گیند کو جج نہ کر پائے، ہیلمٹ پر گیند لگنے سے وہ لڑکھڑا کر گر پڑے، جنہیں فوری طبی امداد دی گئی، جس کے بعد کھلاڑی کی حالت کو تسلی بخش قراردیا گیا لیکن تفصیلی چیک اپ کے لیے انہیں ہسپتال لے جایا گیا تھا۔
