لاہور(نیوز ڈیسک) زمبابوے کے خلاف ون ڈے اور ٹی ٹوئنٹی سیریز کیلئے قومی ٹیم کا اعلان آج یا کل کر دیا جائے گا، ون ڈے سکواڈ میں شعیب ملک، عمر اکمل اور احمد شہزاد کی واپسی کا امکان ہے۔ سکواڈ منتخب کرنے کیلئے سلیکٹرز کا پہلا اجلاس فیصل آباد میں ہوا جہاں تمام سلیکٹرز ٹی ٹوئنٹی ٹورنامنٹ دیکھنے کیلئے موجود ہیں۔ ٹورنامنٹ میں شعیب ملک مسلسل اچھی کارکردگی دکھا رہے ہیں، دونوں کو ون ڈے اور ٹی ٹوینٹی سکواڈ میں شامل کئے جانے کا امکان ہے۔ شعیب ملک اور عمر اکمل نے ٹی ٹوئنٹی ٹورنامنٹ میں اب تک دو دو نصف سنچریز سکور کی ہیں۔ عمر اکمل ورلڈ کپ سکواڈ میں شامل تھے لیکن انہیں بنگلہ دیش کے خلاف سیریز کیلئے ٹیم میں جگہ نہیں دی گئی تھی۔ سلیکٹرز نے ون ڈے کپتان اظہر علی سے مشاورت مکمل کر لی ہے جبکہ شاہد آفریدی سے فون کے ذریعے مشاورت آج کی جائے گی۔ ذرائع کے مطابق کوچ وقار یونس نے بنگلہ دیش کے خلاف سیریز میں نوجوان کھلاڑیوں کی ناقص کارکردگی کے بعد عمر اکمل کی ٹیم میں شمولیت کی حمایت کر دی ہے، عمر اکمل کو وقار یونس کی رپورٹ پر ہی بنگلہ دیش کے خلاف سیریز سے ڈراپ کیا گیا تھا۔