لاہور(اسپورٹس ڈیسک)پاکستان میں انٹرنیشنل ہاکی کا بند دروازہ ایک بار پھر کھلنے کا امکان پیدا ہو گیا اور ایف آئی ایچ نے 6ملکی انٹرنیشنل ٹورنامنٹ کی میزبانی کے لئے پی ایچ ایف کو ٹاسک دے دیا۔ذرائع کے مطابق انٹرنیشنل ہاکی فیڈریشن کی طرف سے لیٹر کے ذریعے پی ایچ ایف کو باقاعدہ آگاہ کیا گیا ہے کہ 4 ٹیموں نے ایونٹ کیلئے کنفرمیشن دی ہے جبکہ مزید 2ٹیمیں آئندہ 2 ہفتوں میں اپنی شرکت کے بارے میں اطلاع دیں گی۔
سیکرٹری پی ایچ ایف شہباز احمد سینئر نے بتایا کہ اے ایچ ایف نے چھ ملکی ٹورنامنٹ ری شیڈول کر دیا ہے اور 4ٹیموں نے پاکستان آنے کی تصدیق کردی ہے۔ انہوں نے کہا کہ ایونٹ میں پاکستان کے علاوہ اومان، قطر، بنگلہ دیش، سری لنکا، قازقستان اور افغانستان کی ٹیمیں شریک ہوں گی۔سیکرٹری فیڈریشن کے مطابق ایونٹ کے کامیاب انعقاد سے نہ صرف پاکستان کے میدان آباد ہوں گے بلکہ شائقین کو بھی دلچسپ مقابلے دیکھنے کو ملیں گے۔
