دبئی (سپورٹس ڈیسک)چیئرمین پی سی بی احسان مانی مشکل وقت میں کپتان سرفراز احمد کی حمایت میں سامنے آ گئے اور انھوں نے وکٹ کیپر کی قیادت پر اظہار اعتماد کرتے ہوئے اگلی سیریز میں ٹیم سے بہتر کھیل کی امیدیں باندھ لیں۔دبئی میں میڈیاسے بات چیت کرتے ہوئے انھوں نے کہا کہ جب ٹیم جیتے تو کپتان کی بہت تعریفیں ہوتی ہیں کہ اس سے اچھا کوئی اور ہے ہی نہیں، اب ہارے ہیں تو نکالنے کی باتیں ہونے لگیں،البتہ میرا ابھی کسی قسم کی تبدیلیوں کا کوئی ارادہ نہیں ہے۔نائب کپتان کی تقرری کے سوال پر انھوں نے کہا کہ میں

1،2روز میں ٹیم مینجمنٹ سے ملاقات کروں گا،ان سے ایشیا کپ میں کارکردگی پر تبادلہ خیال کیا جائیگا، ٹیم کے ناقص کھیل کی وجوہات جاننے کی بھی کوشش ہوگی۔واضح رہے کہ احسان مانی گزشتہ چند روز سے دبئی میں ہی مقیم ہیں، وہ وہاں ایشین کرکٹ کونسل کی میٹنگ میں شرکت کیلیے گئے تھے، اب انھیں انگلینڈ روانہ ہونا ہے جہاں سے7اکتوبر کو لاہور واپسی ہوگی، چیئرمین بورڈ یکم سے3 اکتوبر تک دبئی میں شیڈول آئی سی سی ڈسپیوٹ کمیٹی میں بھارت کیخلاف پاکستانی کیس کی سماعت کے حوالے سے مشاورت کر رہے ہیں۔