تہران( آن لائن )ایران کے سپریم لیڈر نے گزشتہ روز کہاہے کہ جنوب مغربی شہر اہواز میں فوجی پریڈ کے دوران 24افراد کو ہلاک کرنے والے حملہ آوروں کو سعودی عرب اور متحدہ عرب امارات نے فنڈز فراہم کئے ہیں۔اطلاعات کی بنیاد پر یہ بزدلانہ کارروائی ان افراد نے کی ہے،جنہیں امریکیوں نے اس وقت مدد پہنچائی جب وہ عراق میں مشکل میں تھے اور جنہیں سعودی عرب اور متحدہ عرب امارات

نے فنڈنگ کی ہے،یہ بات آیت اللہ علی خامنہ ای نے اپنی سرکاری ویب سائٹ پر پوسٹ کئے گئے اپنے بیان میں بتائی۔انہوں نے’’دہشتگرد حملے‘‘ کے پیچھے ملوث عناصر کی شناخت کے بارے میں مزید تفصیلات نہیں بتائیں۔ہفتے کو حملے کے فوری بعد ایرانی حکام نے کہا تھا کہ انہیں شبہ ہے کہ حملے میں عرب علیحدگی پسند گروپس ملوث ہیں،جن میں کسی کی بھی شام میں موجودگی معروف نہیں ہے۔