اسلام آباد (آئی این پی)چیئرمین سینیٹ نے پنجاب حکومت کے اشتہار میں منظور پشتین کی تصویر دکھانے کا معاملہ تحقیقات کے لئے متعلقہ کمیٹی کے سپرد کردیا ۔منگل کو سینیٹ میں اظہار خیال کرتے ہوئے سینیٹر عثمان خان کاکڑ نے کہا کہ ملک میں مسلسل پشتون قوم اور کلچر کی میڈیا میں تضحیک کی جا رہی ہے۔
انہوں نے کہا کہ پنجاب حکومت نے سرکاری اشتہارات میں کہا کہ یہ لوگ تعصب پھیلا رہے ہیں۔ عثمان کاکڑ نے کہا کہ 25لاکھ سوات سے جبکہ 15لاکھ لوگ وزیرستان سے آئی ڈی پیز بنے،ہر کلچر کی عزت ہونی چاہیے، اس معاملے کی انکوائری ہونی چاہیے۔ انہوں نے کہا کہ ملک میں پانی کی کمی ہے لیکن اس کی ذمہ دار عوام نہیں، ذمہ دار وہ ہیں جنہوں نے 71سال ملک کو چلایا،اس کی سزا ہمیں نہیں دینی چاہیے، بلوچستان میں پانی 1500فٹ نیچے چلا گیا ہے، پہاڑی چشمے سوکھ گئے ہیں،بلوچستان میں پانی جمع کرنے کیلئے 500ارب روپے چاہئیں، چیف جسٹس سے گزارش ہے کہ بلوچستان بھی پاکستان کا حصہ ہے اور وہ ہمارے صوبے کے بھی چیف جسٹس ہیں انہیں ہمارے صوبے کیلئے بھی مہم چلانی چاہیے،کالا باغ ڈیم کو تین صوبوں نے مسترد کیا ہے۔ انہوں نے کہا کہ سب سے بڑا غدار مشرف ہے جس نے آئین کو پامال کیا تھا، ا س پر کوئی بات نہیں کر رہا، ایوب خان نے بھی ہمیں غدار کہا، ضیاء الحق اور مشرف نے بھی غدار کہا،کوئی بھی ادارہ اس پر ہاتھ نہیں ڈال سکتا جو آئین ،جمہوریت اور اکیس کروڑ عوام کا غدار ہے۔
