اسلام آباد(مانیٹرنگ ڈیسک)اقتدار میں آنے کے بعد شیخ رشید کے انداز ہی بدل گئے، غریبوں کیلئے بڑے بڑے دعوے کرنے والے وفاقی وزیر ریلوے شیخ رشید کی آمدپر شہریوں کو سٹی اسٹیشن میں داخلے سے روک دیا گیا۔ تفصیلات کے مطابق عوامی مسلم لیگ کے سربراہ شیخ رشید احمد کے الیکشن میں اپنے حلقے میں موجود متوسط اور غریب لوگوں کی آبادی ڈھوک منگٹال ،
غریب آباد اور دیگر جگہوں سے متعلق بلند و بانگ دعوئوں کی قلعی اس وقت کھل گئی جب وفاقی وزیر ریلوے بننے کے بعد شیخ رشید کے انداز ہی بدل گئے اور عوامی جگہوں پر ناشتہ کرنے والے شیخ رشید کی آمد کے موقع پر شہریوں کو سٹی سٹیشن میں داخلے سے روک دیا گیا۔ سٹی اسٹیشن انتظامیہ نےدفاتر کے داخلی دروازوں پرتالےلگادیے۔شہریوں کو ٹکٹ کے حصول میں پریشانی کاسامنا کرنا پڑ رہا ہے۔واضح رہے کہ اس سے قبل شیخ رشید جب اپنے پروٹوکول کیساتھ راولپنڈی پہنچے تو لال حویلی جاتے ہوئے ان کے راستے میں کھڑی موٹر سائیکلوں کو ٹریفک وارڈن نے گرا دیا تھا ۔ اس موقع پر شیخ رشید نے اپنی گاڑی رکوا کر باہر نکل کر وہاں ویڈیو بناتے تاجر کو کہا تھا کہ میں لحاظ کرتا ہوں ورنہ میں یہ سب اٹھوا سکتا ہوں۔ شیخ رشید کے وفاقی وزیر بننے کے بعد انداز بدلنے پر لوگ حیرت میں مبتلا ہیں۔ خیال رہے کہ تحریک انصاف کی حکومت نے وی آئی پی پروٹوکول اور شاہانہ سہولیات ختم کرنے کا اعلان کر رکھا ہے تاہم ایسا ہوتا نظر نہیں آرہا۔اس سے قبل وزیراعلیٰ پنجاب عثمان بزدار کی اپنے اہل خانہ کے ساتھ سرکاری جہاز میں لاہور سے اسلام آباد کے سفر کی تصاویر بھی سوشل میڈیا پر وائرل ہو چکی ہیں جبکہ دوست کے والد کے جنازے اور سسر سے ملاقات کیلئے وزیراعلیٰ کی میاں چنوں ہیلی کاپٹر آمد اور پاکپتن میں بابا فریدؒ کے مزار پر حاضری کیلئے آمد کے موقع پر دکانیں بند کرانے کا واقعہ بھی سامنے آچکا ہے
