لاہور (سی پی پی )پاکستان پیپلز پارٹی کے مرکزی سیکرٹری اطلاعات سینیٹر مولا بخش چانڈیو نے کہا ہے کہ بڑی بڑی باتوں سے سرخیاں تو بنتی ہیں، ملک نہیں چلتے، تحریک انصاف میں ملک چلانے کی صلاحیت نہیں ، وفاقی، پنجاب، خیبرپختونخواہ حکومتیں اب تک عملی طور پر غیرفعال ہیں۔انہوں نے اپنے جاری کردہ بیان میں کہا کہ تحریک انصاف اب ٹال مٹول نہ کرے قوم سے کئے گئے وعدوں پورے کرے، خان صاحب دو گاڑیوں اور دو ملازموں کے ساتھ وزیراعظم ہاؤس چلا کر دکھائیں۔
ہیلی کاپٹر کا خرچہ پچاس روپےفی کلومیٹر ہے تو وہ بھی ثابت کیا جائے۔انہوں نے کہا کہ صاف نظر آ رہا ہے کہ تحریک انصاف کی تیاری ہے نہ ان میں ملک چلانے کی صلاحیت ہے۔۔وزیراعظم نے پروٹوکول اور سفارتی آداب کے برعکس امریکی وزیرخارجہ کا فون سن کر تنازعہ کھڑا کروا دیا، نئی حکومت نے سوچے سمجھے بنا بھارت کے ساتھ دوستی کی باتیں کیں اور وہاں سے الٹا جواب آیا۔اب ایک بات دہرائی جا رہی ہے کہ وزیراعظم کی جان کو خطرہ ہے۔ قوم کو بتایا جائے کہ انہیں کس سے خطرہ ہے۔
