پشاور(آئی این پی ) پاکستان پیپلزپارٹی کے رہنما سید خورشیدشاہ نے کہا ہے کہ عمران خان وزیراعظم ہا ؤ س سے بنی گالا تک دن میں 2 بار ہیلی کاپٹر سے جاتے ہیں جس کے اخراجات 3 لاکھ روپے ہیں،عمران خان آج بھی 11 گاڑیوں کے پروٹوکول میں جاتے ہیں، ملک کو ترقی کی راہ پر گامزن کرنے کے بجائے پیچھے دھکیل رہے ہیں، پی ٹی آئی کو بھی چاہیئے کہ وہ اعتزاز احسن کی حمایت کرے۔

اتوار کو بلور ہا ؤ س پشاور میں ہارون بلور کے اہلخانہ سے تعزیت کے بعد میڈیا سے بات کرتے ہوئے پیپلزپارٹی کے رہنما خورشید شاہ نے کہا کہ عمران خان نے ابھی تک کوئی نئی بات نہیں کی، وزرا پہلے بھی اکنامی پلس میں سفرکرتے تھے اوران کے باہرعلاج کرانے پر بھی پابندی تھی، پرانی چیزوں کوسرخی پاڈرلگا کرانہیں نئے اقدامات قراردیا جارہا ہے، چھوٹے چھوٹے اعلانات سے کچھ نہیں ہوگا بڑے اقدامات اٹھانا ہوں گے۔رہنما پیپلزپارٹی کا کہنا تھا کہ عمران خان وزیراعظم ہاوس سے بنی گالہ جاتے ہوئے دن میں 2 مرتبہ ہیلی کاپٹر استعمال کرتے ہیں اور ایک ٹرپ 3 لاکھ کا ہوتا ہے، 2 بار ہیلی کاپٹر پر بنی گالا جانا، اس سے زیادہ بچت اور کیا ہوگی؟ وہ آج بھی 11 گاڑیوں کے پروٹوکول میں جاتے ہیں ان کے دعوے ملک کو ترقی کی راہ پر گامزن کرنے کے بجائے پیچھے دھکیل رہے ہیں، ہم 50 لاکھ گھر اور 1 کروڑ نوکریوں کے وعدے عمران خان کو بھولنے نہیں دیں گے۔خورشید شاہ نے کہا کہ صدرِ کے لئے پیپلزپارٹی نیایسا نام دیا ہے جو پاکستان کے لیے اثاثہ ثابت ہوگا، ان پر کوئی الزام نہیں اور (ن)لیگ نے بھی ان کے نام پرکوئی اعتراض نہیں کیا بلکہ طریقے کارپراعتراضات کیے گئے جسے ہم بھی تسلیم کرتے ہیں، پی ٹی آئی کو بھی چاہیئے کہ وہ اعتزاز احسن کی حمایت کرے۔