اسلام آباد(آن لائن) سابق وزیر خزانہ مفتاح اسماعیل نے کہا ہے کہ ہماری حکومت نے عام انتخابات کے لئے 22ارب روپے الیکشن کمیشن کو دیئے تھے ہمیں یہ معلوم نہیں کہ الیکشن کمیشن نے آر ٹی ایس سسٹم کس سے خریدا۔ گزشتہ روز اپنے ایک انٹرویو میں مفتاح اسماعیل نے کہا کہ صاف شفاف الیکشن کرانا الیکشن کمیشن کی ذمہ داری ہے۔ آر ٹی ایس کہاں سے آیا؟ اسکا جواب الیکشن کمیشن ہی دے سکتا ہے۔

اب الیکشن کمیشن کہتا ہے کہ آر ٹی ایس فیل ہو گیا اور نادرا کہتا ہے ایسا نہیں ہوا۔ مفتاح اسماعیل نے کہا کہ میری دعا ہے کہ عمران خان کی حکومت 5سال پورے کرے۔ آصف علی زرداری کیخلاف جے آئی ٹی کی تشکیل پر جواب دیتے ہوئے انہو ں نے کہا کہ میں اس بارے میں بہتر جواب نہیں دے سکتا۔ میں یہ جانتا ہوں کہ ہر صورت قانون پر عمل ہو نہ کسی کو سہولت دی جائے اور نہ کسی کے ساتھ قانون سے ہٹ کر برتاؤ کیا جائے۔