اسلام آباد(مانیٹرنگ ڈیسک)پنجاب میں اکثریتی جماعت ے طور پر سامنے آئے ، حکومت ہم بنائیں گے، آزاد امیدواروں کی بڑی تعداد ہماری ہم خیال، پیپلزپارٹی اور ق لیگ سے بھی بات کرینگے، اگر تحریک انصاف اور الیکشن کمیشن نے روڑے اٹکائے تو ہم ان تمام کوششوں کو ایکسپوز کرینگے اور اس کا جواب دینگے، حمزہ شہباز کا پریس کانفرنس سے خطاب۔ تفصیلات کے مطابق
مسلم لیگ ن کے رہنما اور شہباز شریف کے صاحبزادے حمزہ شہباز نے پریس کانفرنس کرتے ہوئے کہا ہے کہ ملک میں ہونیوالے عام انتخابات میں تمام تر دھاندلی کے باوجود مسلم لیگ ن پنجاب میں اکثریتی جماعت کے طور پر سامنے آئی ہے اور اس نے 129نشستیں حاصل کی ہیں جس کے بعد یہ ہمارا حق ہے کہ ہم پنجاب میں حکومت بنائیں ۔ اس موقع پر حمزہ شہباز کا کہنا تھاکہ آزاد امیدواروں کی بڑی تعداد ان کی ہم خیال ہے جبکہ حکومت سازی کیلئے وہ پیپلزپارٹی اور ق لیگ کیساتھ بھی بات کرینگے۔ حمزہ شہباز نے اس موقع پر عمران خان کو مخاطب کرتے ہوئے کہا کہ عمران خان 2013کے الیکشن میں ہمیں کہا گیا تھا کہ خیبرپختونخواہ میں آپ کو حکومت بنانے نہ دی جائے اور اس موقع پر ہمیں پیش کش بھی کی گئی تھی تاہم ہم نے آپ کے مینڈیٹ کو اس وقت تسلیم کیا اور آج ہم بھی یہی توقع رکھتے ہیں ہمارے مینڈیٹ کو تسلیم کیا جائے ۔ حمزہ شہباز کا کہنا تھا کہ ہم تمام تر تحفظات کے باوجود اگر وفاق میں اپوزیشن میں بیٹھ رہے ہیں تو ہم توقع رکھتے ہیں کہ ہمیں بھی چلنے دیا جائے اور پنجاب میں ہمارے مینڈیٹ کو تسلیم کیا جائے۔ پاکستان کو اس وقت کئی چیلنجز کا سامنا ہے اور ایسے موقع پر بہتر یہی ہے کہ سیاسی طور پر ٹکرائو نہ ہو ۔ مولانا فضل الرحمن کی جانب سے الیکشن نتائج کو مسترد کرنے اور اس پر اے پی سی کے حوالے سے حمزہ شہباز کا کہنا تھا کہ ہم اے پی سی میں شرکت کرینگے وہاں دیکھا جائے گا کہ کیا تجاویز سامنے آتی ہیں۔
