اسلام آباد (مانیٹرنگ ڈیسک) مولانا فضل الرحمان نے الیکشن میں دھاندلی پر آل پارٹیز کانفرنس بلانے کا اعلان کر دیا ہے، مولانا فضل الرحمان نے کہا ہے کہ دھاندلی شدہ نتائج قبول نہیں کریں گے، اس سے قبل پاکستان مسلم لیگ (ن) نے بھی انتخابات کے نتائج کو مسترد کر دیا ہے،مولانا فضل الرحمان کا کہنا ہے کہ انتخابات میں دھاندلی پر آصف علی زرداری اور شہباز شریف سے بات ہو گئی ہے،
دوسری جانب اس سے قبل مسلم لیگ (ن) کے صدر میاں شہباز شریف نے الیکشن نتائج کو ماننے سے انکار کر دیا، میاں شہباز شریف نے پریس کانفرنس کرتے ہوئے کہا کہ 13 جولائی سے پہلے ہمارے سینکڑوں کارکنوں کو گرفتار کیا گیا، ہمارے کارکنوں اور رہنماؤں کے خلاف دہشت گردی کے مقدمات درج کیے گئے، مسلم لیگ (ن) کے صدر شہباز شریف نے پریس کانفرنس کرتے ہوئے کہا کہ اگر سات بجے سے رزلٹ آنا شروع ہوتے ہیں تو لاہور کے کسی حلقے کا سرکاری طور پر اعلان نہیں ہوا، ہمیں پورے پاکستان سے یہ شکایات آئیں کہ ہمیں فارم 45 نہیں دیا جا رہا، الیکشن کمیشن نے ایک گھنٹہ وقت بڑھانے کی درخواست قبول نہیں کی، ڈی جی خان میں پولنگ ایجنٹس کو باہر نکال دیا گیا، شہباز شریف نے کہا کہ آج جو کچھ ہوا ہے ہم پاکستان کو تیس سال پیچھے لے گئے ہیں، آج جو کچھ پولنگ ایجنٹس کے ساتھ ہوا ہے وہ ناقابل برداشت ہے، اوکاڑہ، لاہور اور کے پی کے میں فارم 45 کو ترس گئے، شہباز شریف نے کہا کہ میں یہ بات کہنے پر مجبور ہوں کہ ہم اس رزلٹ کو مسترد کرتے ہیں، لاہور میں ایاز صادق اور میرا بھی رزلٹ روک لیا گیا، شہباز شریف نے کہا کہ خیال تھا کہ الیکشن میں ووٹرز کو آزادانہ اظہار رائے کا موقع دیا جائے گا۔ شہباز شریف نے اپنی پریس کانفرنس کے دوران کہا کہ دھاندلی پر تمام جماعتوں سے رابطہ کریں گے۔
