کراچی(نیوزڈیسک) کرکٹ آئرلینڈ کے چیف ایگزیکٹیو ویرن ڈیوٹرم نے انکشاف کیا ہے کہ جنوری میں پاکستان کرکٹ بورڈ سے رابطہ کیا گیا تھا جس کے بعد آئرش ٹیم کے دورہ پاکستان کی امیدیں روشن ہوگئی ہیں۔پاکستان نے مارچ 2009 کے سری لنکن ٹیم پر لاہور میں حملے کے بعد سے کسی ٹیسٹ ٹیم کی میزبانی نہیں کی ہے جبکہ ملک میں کرکٹ نہ ہونے کی کمی شدت سے محسوس کی جارہی ہے۔اس حملے میں آٹھ افراد ہلاک ہوگئے تھے جبکہ سری لنکن ٹیم کے متعدد کھلاڑیوں سمیت بیشتر افراد زخمی بھی ہوئے تھے۔حال ہی میں زمبابوے کرکٹ بورڈ نے دورہ پاکستان کی تصدیق کی جس کے تحت افریقی ٹیم 3 ون ڈے اور 2 ٹی ٹوئنٹی میچ پاکستان کھیلنے آئے گی۔اس سے قبل بھی آئرش ٹیم دورہ پاکستان پر حامی بھرچکی ہے تاہم کراچی ایئرپورٹ پر حملے کے نتیجے میں یہ دورہ منسوخ کردیا گیا تھا۔آر ٹی ای کی رپورٹ کے مطابق ڈیوٹرم نے اپنے ایک اعلامیے میں کہا کہ ‘ہم اس معاملے پر لگاتار غور کررہے ہیں اور جب صورت حال درست ہوگی دورے پر غور کیا جائے گا۔’انہوں نے کہا کہ ان کی پاکستان کرکٹ بورڈ سے جنوری میں اس سلسلے میں رابطہ ہوا تھا تاہم ورلڈ کپ کے باعث اس پر مزید بات چیت نہ ہوسکی۔انہوں نے کہا کہ پی سی بی کی جانب سے جواب کے بعد اس سلسلے میں مزید بات چیت ہوگی۔آئرلینڈ کو عام طور پر سب سے بہترین ایسوسی ایٹ ٹیم مانا جاتا ہے جس نے گزشتہ تین عالمی کپس کے دوران اپ سیٹ کیے ہیں۔آئرش ٹیم 2007 میں پاکستان، 2011 میں انگلینڈ جبکہ 2015 ورلڈ کپ میں ویسٹ انڈیز کو شکست دے چکی ہے۔