ممبئی (نیوزڈیسک)بنگلہ دیش کرکٹ بورڈ (بی سی بی) نے رواں برس جون میں بھارت کے خلاف ہوم سیریز کے شیڈول جاری کر دیا۔ مہمان ٹیم دورے کے دوران میزبان ٹیم کے خلاف ایک ٹیسٹ اور تین ون ڈے میچز کی سیریز کھیلے گی۔ بی سی بی کی طرف سے جاری کردہ بیان کے مطابق بھارت اور بنگلہ دیش کے درمیان واحد ٹیسٹ میچ فتح اللہ سٹیڈیم میں کھیلا جائے گا، یہ بنگلہ دیش میں مون سون سیزن کے دوران ٹیسٹ میچ کھیلنے کا پہلا موقع ہو گا۔ شیڈول کے مطابق بھارتی ٹیم 7 جون کو ڈھاکہ پہنچے گی اور ٹیسٹ سیریز سے قبل دو روز تک ٹریننگ کرے گی، دونوں ٹیموں کے درمیان واحد ٹیسٹ 10 سے 14 جون تک فتح اللہ کرکٹ سٹیڈیم میں کھیلا جائے گا، فتح اللہ نو برس بعد کسی ٹیسٹ میچ کی میزبانی کرے گا۔ ون ڈے سیریز کے تمام میچز میرپور میں کھیلے جائیں گے۔ سیریز کا پہلا ایک روزہ میچ 18 جون، دوسرا میچ 21 جبکہ تیسرا اور آخری میچ 24 جون کو کھیلا جائے گا۔