لاہور(مانیٹرنگ ڈیسک)پیپلز پارٹی کے رہنمااعتزاز احسن نے کہا کہ زبان زد عام ہے کہ ہارلے اسٹریٹ کلینک شریف خاندان کی ملکیت ہے۔بےنظیر بھٹو کی سالگرہ کی تقریب سے خطاب کرتے ہوئے انہوں نے کہا ہارلے اسٹریٹ کوئی ہسپتال نہیں کلینک ہے۔ لیکن وہاں دل کے بائی پاس ہوتے ہیں۔ سابق وزیراعظم نواز شریف کو یقین ہے کہ انہیں سزا ہوگی اس لیے تاخیری حربے استعمال کیے جا رہے ہیں اور یہ سب شہباز شریف کا پتا کاٹنے کیلئے ہو رہا ہے۔
انہوں نے کہا کہ بے نظیر بھٹو نے اپنا علاج سکھر جیل کی کال کوٹھڑی میں کروایا، یہ نہیں کہ مقدمہ چل رہا ہے اور ہارلے اسٹریٹ جا رہے ہوں۔انہوں نے کہا کہ لوگ کہہ رہے ہیں کہ ہارلے اسٹریٹ کلینک کے باہر سے کوئی خبرہی نہیں آتی، ہارلے اسٹریٹ کے باہر ان کے مفرور بیٹے آکر بات کرتے ہیں۔ یہ چاہتے ہیں کہ اگلی حکومت میں مریم نواز کو وزیراعظم یا اپوزیشن لیڈر بنایا جائے۔ پہلے بھی شہباز شریف سے ہاتھ کرگئے، اعلان شہباز کا کیا وزیراعظم شاہد خاقان کو بنایا۔
