کراچی (آئی این پی )ایم کیو ایم پاکستان میں دھڑے بندی کی وجہ بننے والے کامران ٹیسوری ٹنکی گرانڈ جلسے میں اسٹیج پر نہیں بیٹھے بلکہ کارکنوں کے درمیان نظر آئے۔کامران ٹیسوری ، علی رضا عابدی کے ہمراہ جلسہ گاہ پہنچے اور دونوں کارکنوں کے لیے مختص گیٹ سے جلسہ گاہ داخل ہوئے۔اس موقع پر کامران ٹیسوری نے کہا کہ مجھے لگ رہا ہے دریا سے نکل کر سمندر میں آگیا ہوں، کارکنان کے ساتھ ہونا باعث فخر ہے۔بہادر آباد گروپ نے یہ شرط رکھی تھی کہ کامران ٹیسوری اسٹیج پر موجود نہیں ہوں گے

جس کے بعد کامران ٹیسوری نے عام کارکن کی حیثیت سے جلسے میں شرکت کا فیصلہ کیا تھا۔اس حوالے سے علی رضا عابدی نے کہا کہ چھوٹی موٹی باتوں کو نظر انداز کرنا ہوگا، بہادرآباد والے کامران ٹیسوری کو تسلیم کرلیں۔یاد رہے کہ مارچ میں ہونے والے سینیٹ انتخابات کے لیے فاروق ستار کی جانب سے کامران ٹیسوری کو ٹکٹ دینے کے معاملے پر ایم کیو ایم میں پھوٹ پڑ گئی تھی اور پارٹی دو دھڑوں(بہادرآباد اور پی آئی بی گروپ) میں تقسیم ہوگئی تھی، جو اب بھی برقرار ہے۔