اسلام آباد(مانیٹرنگ ڈیسک)عوامی تحریک کے سربراہ شیخ رشیداحمد نے کہا ہے کہ چوہدری نثار کی باتوں میں بڑا وزن ہے ، نوازشریف محموداچکزئی کی گود میں بیٹھا چکا ہے جو پاکستان کو تباہ ، فوج اور عدلیہ کومفلوج کرنا چاہتے ہیں مگر وہ اس مشن میں اکیلے رہ جائیں گے ،پاکستان ، فوج اور عدلیہ ہمیشہ قائم و دائم رہیں گے،،چوہدری نثار کانوازشریف اور مریم بی بی کی قیادت والی ن لیگ میں رہنا ناممکن ہے ، وہ جلد آزاد گروپ بنائیں گے،

12اراکین ن لیگ سے پہلے الگ ہو چکے ہیں 30مزید اس گروپ میں شامل ہوجائینگے۔شیخ رشید احمدنے چوہدری نثار کی پریس کانفرنس پر رد عمل میں کہا کہ نوازشریف کو ہمیشہ بعد میں سمجھ آتی ہے کیونکہ ان کے دماغ کا اوپر والا حصہ مفلوج ہوچکا ہے چوہدری نثار کی باتوں میں بڑا وزن ہے واقعی نوازشریفمحموداچکزئی کی گود میں بیٹھا ہے جو پاکستان کو تباہ کرنا چاہتا ہے اور پاک فوج اور عدلیہ کو مفلوج کرنے کیلئے کوشش کررہا ہے ۔ایک سوال پرانہوں نے کہاکہ مجھے یقین ہے کہ چوہدری نثار علی خان ایک آزادگروپ کو لیڈ کریں گے اور یہ حکومت کی مدت ختم ہونے کے بعد بن جائے گا ۔انہوں نے کہاکہ شہبازشریف نوازشریف سے تو کیا مریم سے بھی ڈرتے ہیں وہ کبھی چوہدری نثار کی طرح نظریاتی نہیں بن سکتے ۔انہوں نے کہاکہ میں نے جن 22ن لیگی اراکین کی علیحدگی کی بات کی تھی ان میں سے 12تو الگ ہو چکے ہیں باقی بندے بھی اس آزاد گروپ میں چلے جائیں گے اس کے علاوہ 30 اراکین اور بھی ہیں جو آزاد گروپ میں جاسکتے ہیں اور یہ گروپ جلد بنتا دیکھ رہا ہوں۔شیخ رشید نے کہا کہ چوہدری نثارنے جو آج باتیں کی ہیں وہ پوری قوم کی آواز ہے جبکہ نوازشریف جی ایچ کیو کے گیٹ نمبر چار کی پیداوار ہے اور وہ فوجی جوتے چاٹ چاٹ کر یہاں تک پہنچے ہیں اگر ضیاء الحق کی تاریخ نکال دی جائے تو پیچھے کچھ نہیں بچتا ، گوالمنڈی سے تحریک استقلال کے ٹکٹ پر نوازشریف نے ووٹ لئے جو

شرمندگی سے خالی نہیں ہے۔ انہوں نے کہاکہ نوازشریف اب اپنی لوٹ مار اور منی لانڈرنگ کے ذریعے لوٹی گئی دولت کو بچانے کے لئے فوج کیخلاف بیانیہ دے رہے ہیں لیکن مجھے اس پر کوئی شک نہیں کہ نوازشریف کی سیاست اب ختم ہو چکی ہے اور ن لیگ کی قیادت ٹکراؤ کی جانب جارہی ہے لیکن جب نوازشریف پیچھے مڑ کر دیکھیں گے تو وہ اکیلے رہ جائیں گے کیونکہ شکست ان کا مقدر بن چکی ہے مگر پاکستان ، پاک فوج اورعدلیہ قائم و دائم رہیں گے ۔