اسلام آباد (این این آئی)الیکشن کمیشن نے کہا ہے کہ عام انتخابات 2018 کیلئے مکمل تیار ہیں ٗ انتخابات کوئی خلائی مخلوق کرا رہی ہے اس کی تردید کرتے ہیں ٗ یہ بیان آئین کی روح اور الیکشن کمیشن کے مینڈیٹ کے خلاف ہے ۔ جمعہ کو ترجمان الیکشن کمیشن نے کہا کہ انتخابات کوئی خلائی مخلوق کرا رہی ہے اس کی تردید کرتے ہیں ،یہ بیان آئین کی روح اور الیکشن کمیشن کے مینڈیٹ کے خلاف ہے ٗآئین کے

تحت الیکشن کمیشن آئینی ٗقانونی ذمہ داریوں میں مکمل آزاد ہے ٗاہم منصب پر فائز شخصیات ایسے بیانات سے گریز کریں۔انہوں نے کہا کہ ایسے بیانات محض قیاس آرائیوں اورمفروضوں پر مبنی ہوتے ہیں اور آئین کے منافی اور آئین کاتمسخر اڑانے کے مترادف ہیں۔واضح رہے کہ گزشتہ روز صحافیوں سے غیر رسمی گفتگو میں وزیراعظم شاہد خاقان عباسی نے کہا کہ اسمبلی اپنی مدت پوری کریگی ٗ آئندہ انتخابات شفاف ہوں گے اور الیکشن 90 دن میں نہیں بلکہ 60 دن میں ہوں گے جب کہ خلائی مخلوق انتخابات کرائے گی تاہم ہم انتخابات میں حصہ لیں گے۔