لاہور (نیوز ڈیسک) سابق صدر مملکت و پاکستان پیپلز پارٹی پارلیمنٹرین کے سربراہ آصف علی زرداری سے ملاقات کر کے فاٹا سے رکن قومی اسمبلی ساجد حسین طوری اور مسلم لیگ (ن) فاٹا کے جنرل سیکرٹری سہیل آفریدی نے پیپلز پارٹی میں شمولیت کا اعلان کر دیا ۔تفصیلات کے مطابق گزشتہ روز آصف علی زرداری سے فاٹا کے ایم این اے ساجد حسین طوری اور مسلم لیگ (ن) فاٹا کے جنرل سیکریٹری سہیل آفریدی نے بلاول ہاؤس لاہور میں ملاقات کر کے شمولیت کا اعلان کیا ۔
اس موقع پر ہمایوں خان ،آخوند زادہ چٹان اور سعید خان بھی موجود تھے ۔ ساجد طوری دو مرتبہ فاٹا سے رکن قومی اسمبلی رہے ہیں۔ ترجمان آصف زرداری کے مطابق فاٹا سے مزید شخصیات پیپلز پارٹی میں شامل ہو رہی ہیں ۔علاوہ ازیں سابق صدر آصف علی زرداری سے قمر زمان کائرہ ، سابق ایم این اے مجتبیٰ کھرل نے بھی ملاقات کی ۔ اس کے ساتھ آصف زرداری سے رنالہ کے چیئرمین ملک طارق نے کونسلروں سمیت اور اوکاڑہ کے علی حسنین فیصل گوندل نے بھی ملاقات کی ۔
