چندی گڑھ (نیوز ڈیسک) کرن بالا جس کا تعلق ہوشیار پور بھارت سے ہے وہ سکھ یاتریوں کے ساتھ تہوار منانے پاکستان ننکانہ صاحب آئی، جہاں آ کر اس نے ایک پاکستانی نوجوان سے شادی کر لی اور اسلام قبول کرکے نیا نام آمنہ بی بی رکھ کر سب کو حیران کر دیا،

کرن بالا کے سابق سسر ترسیم سنگھ نے بتایا کہ 32 سالہ کرن بالا دس اپریل 2018ء کو پاکستان گئی تھی اور کرن بالا نے بچوں سے کہا تھا کہ وہ درشن کرکے جلد گھر واپس آ جائے گی۔ واضح رہے کہ کرن بالا کے شوہر 2013ء میں ایک روڈ ایکسیڈنٹ میں فوت ہو گئے تھے۔ کرن بالا بیوہ ہے اور اس کے تین بچے ہیں جن کے نام اندرجیت، ارجن اور گورمیت ہیں۔ اس کے سابق سسر ترسیم سنگھ نے بتایا کہ وہ اپنے شوہر کی موت کے بعد گم صم رہنے لگی اور وہ موبائل تک محدود ہو کر رہ گئی۔ کرن بالا کے سابق سسر نے بتایا کہ مجھے موبائل اور نیٹ چلانا نہیں آتا ہے، بہو زیادہ تر انٹرنیٹ پر مصروف رہتی تھی، انہوں نے بتایا کہ کرن بالا نے کب اور کیسے پاکستانی نوجوان سے رابطہ کیا، اس کا مجھے کوئی علم نہیں۔ جب کرن بالا سے گھر والے پوچھتے کہ وہ کہاں بات کر رہی ہے تو وہ یہ کہہ کر بات کو ٹال دیتی کہ رشتے دار سے بات کر رہی ہوں۔ اس کے سابق سسر نے کہا کہ مجھے شک ہے کہ وہ پاکستان کی خفیہ ایجنسی آئی ایس آئی کے جال میں پھنس گئی ہے اور وہ ان کے لیے کام کر رہی ہو، کرن بالا کے فیس بک اکاؤنٹ اور موبائل فون کی تفصیلات حاصل کرکے فی الحال ہندوستانی سکیورٹی ایجنسیاں اور پنجاب پولیس واقعہ کی حقیقت جاننے کی کوشش کر رہی ہے۔