اسلام آباد(سی پی پی) سابق وزیراعظم نواز شریف نے کہاہے کہ اڈیالہ جیل میں تیاریاں پہلے ہی شروع کر دی گئیں، اڈیالہ والوں کو کیسے پتہ چلا کہ کوئی آرہا ہے،6 ماہ کی مدت ٹرائل مکمل نہیں بلکہ سزا سنانے کیلئے تھی۔اسلام آباد کی احتساب عدالت میں پیشی کے موقع پر کمرہ عدالت میں صحافی نے نواز شریف سے سوال کیا کہ کسی خاص مہمان کی آمد کے لیے اڈیالہ جیل کی صفائی کی خبریں چل رہی ہیں جس پر انہوں نے کہا کہ جیل میں تیاری پہلے سے شروع کردی گئی ہے۔

سابق وزیراعظم نے کہا کہ اڈیالہ والوں کو کیسے پتہ چلا کہ کوئی آ رہا ہے، 6 ماہ کی مدت ٹرائل مکمل کرنے کے لیے نہیں بلکہ سزا سنانے کے لیے تھی۔صحافی نے سوال کیا کہ آپ کے دائیں بائیں بھی وہی لوگ ہوتے ہیں جو وفاداریاں تبدیل کرتے رہتے ہیں جس پر نواز شریف کا کہنا تھا کہ جنوبی پنجاب میں وفاداریاں تبدیل کرنے والے کیا ایسے ہی چلے گئے ؟وفاداریاں تبدیل کرنے والوں کو عوام نے ووٹ نہیں دینے جبکہ میرے دائیں بائیں وہ لوگ نہیں بلکہ کمیٹڈ لوگ ہوتے ہیں،ہمارے ساتھ اس وقت وہ لوگ موجود ہیں جو نسلوں سے مسلم لیگی ہیں۔سابق وزیراعظم نے کہا کہ نگراں حکومت میں نیب قوانین کو غیر موثر کرنے سے متعلق وزیراعظم سے بات ہوئی ہے، چاہتے ہیں انتخابات میں حصہ لینے والے امیدواوں پر نیب کا دبا نہیں ہونا چاہیے۔صحافی کے سوال کہ چوہدری نثار کے بارے میں آپ کیا کہتے ہیں، قوم جاننا چاہتی ہے پر نواز شریف نے کہا کہ ان کے حوالے سے قوم سب جانتی ہے اور پاکستانی قوم مجھ سے جانے بغیر سب کچھ جانتی ہے۔