لاہور (نیوز ڈیسک) سابق وزیراعظم نواز شریف پر جوتا پھینکنے والے ملزم اور اس کے دو ساتھی ملزمان کی عدالت نے ایک ایک لاکھ مچلکے کے عوض درخواست ضمانت منظور کر لی ہے۔ ذرائع کا کہنا ہے کہ میاں نواز شریف پر جوتا پھینکنے والے گرفتار کیے گئے تینوں ملزمان کی ضمانت منظور کر لی گئی ہے، کینٹ کچہری لاہور کی عدالت کے جج نے تینوں ملزمان کی ایک ایک لاکھ مچلکے کے عوض ضمانت کی درخواست منظور کر لی ہے۔ نواز شریف
پر جوتا پھینکنے کے بعد ان تینوں ملزمان کو گرفتار کیا گیا تھا۔ واضح رہے کہ جوڈیشل مجسٹریٹ یوسف سردار نے ملزمان کی درخواست ضمانت پر سماعت کی، یہ درخواست ضمانت ملزمان عبدالغفور، منور حسین اور محمد ساجد نے دائر کی تھی، ان ملزمان کے وکیل نے عدالت سے ان کی ضمانت کی استدعا کی تھی جسے عدالت نے منظور کر لیا۔ یاد رہے کہ تھانہ قلعہ گجر سنگھ میں چار مختلف دفعات کے تحت ان ملزمان کے خلاف مقدمہ درج تھا۔
