چکدرہ (آئی این پی) وفاقی وزیر داخلہ احسن اقبال نے کہا ہے کہ ترقیاتی اہداف کیلئے سیاسی استحکام ناگزیر ہے‘ خطے کے دیگر ممالک کی ترقی کی وجہ سیاسی استحکام ہے‘ ہمیں ملک میں امن و استحکام برقرار رکھنا ہے‘ بے یقینی کی صورتحال میں بہترین وسائل اور ذرائع کے باوجود ملک ترقی نہیں کرسکتا‘ بیسویں صدی سیاسی جدوجہد کی صدی تھی جبکہ اکیسویں صدی اقتصادی ترقی کی صدی ہے۔
مالاکنڈ یونیورسٹی میں اکیڈمک بلاک کی افتتاحی تقریب سے خطاب کرتے ہوئے وفاقی وزیر داخلہ احسن اقبا نے کہا کہ اکیسویں صدی اقتصادی صدی ہے بیسویں صدی سیاسی جدوجہد کی صدی تھی جس میں اقوام نے جدوجہد کی۔ بیسویں صدی نے سیاسی کشمکش دیکھی۔ ہمارا سفر ابھی لمبا ہے دنیا کے ملک پانچ برس میں سدھر نہیں سکتے بلکہ دس سالوں میں بھی نہیں سدھر سکتے۔ ملائشیا‘ چین‘ کوریا‘ سنگا پور اور ترکی کی ترقی عشروں پر محیط ہے اور سیاسی استحکام کا نتیجہ ہے جب ملک میں بے یقینی کی صورتحال ہوگی تو ملک بہترین ذرائع کے باوجود ترقی نہ کرسکے گا۔ احسن اقبال نے کہا کہ زمین میں بیج بونے کے بعد مناسب دیکھ بھال سے اچھی فصلیں ملتی ہیں قومیں بھی اسی طرح ترقی کرتی ہیں۔ ہمیں ملک میں امن و استحکام برقرار رکھنا ہے تاکہ پھل پھول سکیں اور ہم ان پھلوں سے فائدہ اٹھا سیکں۔ ترقیاتی اہداف کیلئے سیاسی استحکام ناگزیر ہے۔
