اسلام آباد(مانیٹرنگ ڈیسک)گرل فرینڈ بن کر بہن بھائی سے پیسے بٹورتی رہی، نوجوان کو معلوم ہونے پر اس نے خودکشی کر لی، گھر والوں نے زمیندار کے خلاف قتل کا مقدمہ درج کروا دیا۔ تفصیلات کے مطابق تھانہ صدر کے علاقہ چک نظام کے زمیندار مطیع ﷲ کے ڈیرے پر کام کرنے والے ملازم نوجوان اشرف نے مبینہ طور پر پھندا لگا کر خودکشی کر لی تھی اور اب زمیندار کے ہاتھوں

مبینہ طور پر محنت کش کے قاتل کا ڈراپ سین ہو گیا ہے۔ محنت کش اشرف طلاق یافتہ تھا جبکہ دوسری شادی کرنا چاہتا تھا۔ اشرف کے اہل خانہ نے زمیندار مطیع اللہ کے خلاف قتل کا مقدمہ درج کروا رکھا ہےجس کی تفتیش پولیس کر رہی تھی۔ پولیس تفتیش میں انکشاف ہوا ہے کہ چند سال قبل اشرف نے اپنی بیوی کو طلاق دے دی تھی اور وہ دوسری شادی کرنا چاہتا تھا جس کے پیش نظر اس کی بہن سنبل نے ایک دن اشرف کو کسی اجنبی نمبر سے فون کیا اور اسے اپنا نام عینی بتا کر دوستی کی خواہش ظاہر کی یہ سلسلہ کئی روز تک جاری رہا اور دونوں دوست بن گئے، جب اشرف نے گھر کے نمبر پر فون کر کے بتایا کہ اسے ایک لڑکی پسند ہے اور وہ اس سے شادی کرنا چاہتا ہے تو اس کی بہن سنبل نے اس سے لڑکی کا پتہ اور فون نمبر پوچھا، جس پر اشرف نے اسے سب کچھ بتا دیا. چند روز گزرنے کے بعد سنبل نے اس سے پیسوں کا مطالبہ کیا کہ عینی کو پیسوں کی ضرورت ہے تو 35 ہزار روپے بھجوا دو اسی طرح مختلف اوقات میں اشرف نے اپنی بہن کو 80 ہزار روپے بھجوا دئیے ، جب اشرف نے اپنی بہن سنبل سے لڑکی کے بارے پوچھا کہ کب ان کے گھر رشتے کے لئے جاؤ گے تو اس نے کہا کہ وہ اچانک نمبر بند کر کے غائب ہو گئی ہے. شک گزرنے پر جب اشرف نے سارے معاملے کو جاننے کی کوشش کی تو اسے پتہ چلا کے عینی نام کی کوئی لڑکی نہیں بلکہ وہ اس کی بہن سنبل ہے.
پولیس کا یہ بھی کہنا تھا کہ واقعہ کی تمام زاویوں سے تفتیش جاری ہے جبکہ پھندا لینے والی رسی بھی فرانزک لیبارٹری بھجوا دی ہے. فرانزک رپورٹ آنے پر اصل حقائق سامنے آ جائیں گے یہ واقعہ خودکشی ہے یا پھر اسے قتل کیا گیا ہے۔