لاہور (مانیٹرنگ ڈیسک) سینئر سیاستدان جاوید ہاشمی نے ایک نجی ٹی وی چینل سے گفتگو کرتے ہوئے حیرت انگیز دعویٰ کرتے ہوئے کہا کہ چوہدری نثار نے انہیں پارٹی سے نکلوایا۔ اپنی گفتگو میں انہوں نے کہاکہ یہ چوہدری نثار تھے جنہوں نے انہیں پارٹی سے نکلوانے میں اہم ترین کردار ادا کیا۔ جاوید ہاشمی نے کہا کہ چوہدری نثار مسلم لیگ (ن) میں ان کے کردار کے مخالف تھے۔ اس موقع پر جاوید ہاشمی نے کہا کہ چوہدری نثار کو تمام تر تنازعات کے باوجود ن لیگ کا حصہ رہنا چاہیے۔
سینئر سیاستدان نے کہا کہ اگر انہوں نے مسلم لیگ (ن) کو چھوڑ دیا تو اس سے نقصان صرف ن لیگ کا ہی ہو گا۔ یاد رہے کہ چوہدری نثار کے مریم نواز کے ساتھ اختلافات کی وجہ سے وہ ن لیگ کے چھوڑنے کی خواہش کا اظہار کر چکے ہیں، اس کے علاوہ ن لیگ کے رہنما پرویز رشید کا بھی کہنا ہے کہ ان کے ٹکٹ کا فیصلہ صرف اور صرف شہباز شریف نے کرنا ہے۔ اس حوالے سے سینئر صحافی و تجزیہ نگار حامد میر نے ایک نجی ٹی وی چینل کے پروگرام میں گفتگو کرتے ہوئے کہا کہ کچھ معاملات پر چوہدری نثار علی خان اور شہباز شریف ایک پیج پر نہیں ہیں، انہوں نے مثال دیتے ہوئے کہا کہ گذشتہ دنوں میں جو بیانات چوہدری نثار علی خان نے دیے ہیں اور انہوں نے اس سے قبل بھی کچھ پریس کانفرنسز کی تھیں تو اس پر شہباز شریف نے ان سے درخواست کرتے ہوئے کہا تھا کہ آپ نہ بولیں، اس موقع پر چوہدری نثار علی خان نے میاں شہباز شریف سے کہا تھا کہ میں نہیں بولتا مگر آپ باقی دوسرے لوگوں کو بھی روکیں۔ سینئر صحافی نے کہا کہ جب بھی کوئی بیان آتا ہے چوہدری نثار اس پر ردعمل دیتے ہیں، انہوں نے مزید کہا کہ پرویز رشید کہہ رہے ہیں کہ میاں شہباز شریف نے چوہدری نثار علی خان کا فیصلہ کرنا ہے، سینئر صحافی نے کہا کہ اصل میں وہ یہ کہہ رہے ہیں شہباز شریف چوہدری نثار کو پارٹی سے نکالیں، حامد میر نے کہا کہ میرا خیال ہے کہ شہباز شریف کوشش کریں گے کہ چوہدری نثار کو ن لیگ سے نہ نکالا جائے، سینئر صحافی نے کہاکہ اگر نواز شریف کی جانب سے ان پر دباؤ آ گیا کہ انہیں نکالو تو شہباز شریف یہ دباؤ برداشت نہیں کر سکیں گے ان میں نہ کرنے کی ہمت نہیں اور یہی ان کا سب سے بڑا مسئلہ ہے یہ ان کی کمزوری بھی ہے اور طاقت بھی ہے۔
