سیالکوٹ(سی پی پی) وزیر خارجہ خواجہ آصف نے کہا ہے کہ 2018 میں الیکشن کا میدان لگے تو احتساب اور جوڈیشل مارشل لا کا کہنے والوں کو ان کی اوقات پتا چل جائے گی۔سیالکوٹ میں ورکرز کنونشن سے خطاب کرتے ہوئے خواجہ آصف نے کہا کہ کوئی کہتا ہے جوڈیشل مارشل لا لگا، کوئی کہتا ہے احتساب کرو پھر انتخابات کرو، اب میدان لگے گا تو انہیں پتا چلے گا ان کی کیا اوقات ہے۔انہوں نے کہا کہ انتخابات میں عوام منصف ہوں گے اور فیصلہ کریں گے کہ 2018 کے الیکشن کی کشتی کون جیتے گا۔

وزیر خارجہ کا کہنا تھا کہ نوازشریف کے مخالفین نے انہیں نکال دیا لیکن وہ کبھی ان کے ترقیاتی منصوبوں کو نکالنے کے قابل نہیں ہوں گے جب کہ مخالفین سمجھتے ہیں کہ وہ ہمیں نیب میں گھسیٹ کر ہمارے کردارپر دھبہ لگا سکتے تھے۔خواجہ آصف نے مزید کہا کہ شریفوں کے پاس عوام کی حمایت ہے، نوازشریف کی شہرت میں اس وقت بھی اضافہ ہوا جب سابق ڈکٹیٹر نے انہیں اقتدار سے باہر کیا۔وزیر خارجہ کا کہنا تھا کہ حکمرانی ہمارا حق ہے اور تاریخ گواہ ہے کہ کس نے حقیقات میں آئین توڑا۔