لاہور ( این این آئی) ترجمان پنجاب حکومت ملک محمد احمدخان نے چیئرمین تحریک انصاف کی شرپسندانہ ٹویٹ پر اظہار افسوس کرتے ہوئے کہا ہے کہ میٹرو بس راولپنڈی پراجیکٹ پر آڈیٹر جنرل کے 4سالہ ابتدائی مشاہدات کی رپورٹ پر پنجاب حکومت کے جوابات بھی تسلیم کئے جاچکے ہیںجبکہ عمران خان کی آنکھ اب کھلی ہے، حقیقت یہ ہے کہ چیئرمین تحریک انصاف آڈٹ معاملات کو کرپشن کا رنگ دے کر خیبرپختونخوا میں اپنی حکومت کی ناقص کارکردگی چھپا رہے ہیں۔

ملک احمد خان نے کہا کہ میٹرو بس راولپنڈی ،اسلام آبادمنصوبے میں نام نہاد کرپشن عمران خان کا ایک اور جھوٹ ہے۔ وہ اپنے ہر دن کاآغاز بے سروپا بات سے کرنے کے عادی ہیں۔ پورے پنجاب میں شہباز شریف حکومت کے ترقیاتی منصوبے شفافیت کے لحاظ اپنی مثال آپ ہیں۔ بہتر ہوگا کہ عمران خان بہتان طرازی کی بجائے خیبرپختونخوا کے عوام کی بہتری پر توجہ دیں جو کئی برسوں سے پشاور میں میٹرو بس منصوبہ شروع ہونے کے منتظر ہیں۔ انشااللہ محمد شہباز شریف ہی آئندہ وزیراعظم بن کر پشاور میٹرو بس منصوبہ پایہ تکمیل تک پہنچائیں گے۔ ملک محمد احمد خان نے کہا کہ راولپنڈی اسلام آباد میٹرو منصوبہ تمام طے شدہ معیارات اور قواعد مدنظر رکھتے ہوئے مکمل کیا گیا۔عمران خان عوامی فلاح کے ہر منصوبے کو متنازعہ بنانے کے درپے ہیں۔ ترجمان پنجاب حکومت نے کہا کہ عمران خان کو بچگانہ الزام تراشی پر ملک کے سب سے غیر سنجیدہ سیاستدان ہونے کا ’اعزاز‘حاصل ہے۔ پہلے بھی ان کے درجنوں جھوٹوں کا پول کھل چکا ہے۔ اب بھی وہ مذموم عزائم میں ناکام ہونگے۔