ابو ظہبی (این این آئی) متحدہ عرب امارات کی حکومت نے دو بیویاں رکھنے والے مردوں کوہاؤسنگ الاؤنس فراہم کرنے کا اعلان کیا ہے۔عرب میڈیا کے مطابق ملک میں غیر شادی شدہ خواتین کی تعداد کم کرنے کیلئے متحدہ عرب امارات نے اْن اماراتی مردوں کو ہاوسنگ الاؤنس دینے کا فیصلہ کیا ہے جن کی دو بیویاں ہیں۔متحدہ عرب امارات کے وزیر برائے ترقیاتی انفرااسٹرکچر ڈاکٹر عبداللہ نے فیڈرل نیشنل کونسل کے اجلاس کے دوران
اس بات کا اعلان کیا کہ جو اماراتی شہری دو بیویاں رکھے گا اسے شیخ زید ہاؤسنگ سکیم کے تحت الاؤنس دیا جائے گا۔انہوں نے کہا کہ ہاؤسنگ الاؤنس کے خواہش مند افراد کیلئے ضروری ہے کہ وہ دوسری بیوی کو اْسی معیار کی رہائشی سہولیات فراہم کریں جو پہلی بیوی کو حاصل ہیں۔اس کے علاوہ نیشنل کونسل اجلاس کے شرکاء نے مردوں کیلئے دوسری شادی ممکن بنانے کے طریقہ کار کو آسان بنانے پر زور دیتے ہوئے کہا کہ اس پروگرام کی مدد سے غیر شادی شدہ خواتین کی تعداد میں کمی لائی جا سکتی ہے۔
