لاہور( این این آئی)تحریک انصاف کے چیئرمین عمران خان نے غیر فعال دیرینہ کارکنوں کو واپس لانے اور عوامی رابطہ مہم شروع کرنے کا اعلان کرتے ہوئے کہا ہے کہ ہم جدوجہد کر کے ملک کو مافیاز سے چھڑائیں گے ،پرانے دوستوں او رکارکنوں کو بھولا نہیں ہوں ، پارٹی جب اقتدار میں آئے گی تو انہیں پوری طرح عزت اور پوزیشن دیں گے ، اگر پارٹی میں نئے لوگ شامل نہ ہوں تو یہ ایک این جی او بن جاتی ہے ،

نئے لوگوں کے آنے سے پارٹی بنتی ہے ۔ ان خیالات کا اظہار انہوں نے گارڈن ٹاؤن میں چیئرمین سیکرٹریٹ میں کارکنوں سے ملاقات میں گفتگو کرتے ہوئے کیا ۔ عمران خان نے کہا کہ ہم نے مافیاز کے خلاف جدوجہد کرنی ہے اور اس ملک کو ان سے چھڑانا ہے ۔ ہم رابطہ مہم شروع کرنے جارہے ہیں میں خود بھی عوام کے پاس جارہا ہوں ۔ یہاں بہت سے لوگ ہیں جو 18سے 21سال سے ہمارے ساتھ کھڑے ہیں اور ان لوگوں نے پارٹی کیلئے بڑی جان ماری ہے ۔ عمران خان نے پارٹی سے ناراض ہونے والے لوگوں کو بھی واپس لانے کا اعلان کرتے ہوئے کہا کہ پارٹی اور عمران خان آپ کو بھولا نہیں ہے ،آپ ہمارے مشکل وقت کے ساتھی ہیں ۔ جب ہم نے جدوجہد کا آغاز کیا تو اس وقت ہمارے ساتھ بہت کم لوگ تھے ،جتنے لوگ آج یہاں اس وقت ہم اسے بڑا جلسہ سمجھتے تھے ۔ عمران خان نے ماضی کو یاد کرتے ہوئے کہا کہ ایک دفعہ مجھے شاہدرہ میں کارنر میٹنگ میں شرکت کی دعوت دی گئی جب فاصلہ طے کر کے وہاں پہنچے تو صرف چار لوگ موجو د تھے لیکن مجھے ان کا جذبہ یاد ہے ۔ عمران خان نے بتایا کہ ایک مرتبہ کوٹ لکھپت گئے ایک دم شور آ گیا اور نعرے لگنا شروع ہو گئے میں سمجھا کہ باہر نکلیں گے تو عوام کا سمندر ہوگا لیکن دیکھا تو گراؤنڈ خالی تھا اور صرف وہی لوگ تھے جو گاڑی کے آس پاس جمع تھے۔ اس موقع پر عمران خان نے شبیر سیال کو مخاطب کرتے ہوئے کہا

کہ آپ نیا پاکستان دیکھ کر اوپر جاؤ گے تم اتنی جلد نہیں جاؤ گے جس پر شرکاء نے بھرپو رقہقہ لگایا ۔ عمران خان نے کہا کہ شبیر سیال اس وقت ہماری جماعت کا صدر تھا جب کوئی ہمارا صدر بننے کیلئے تیار نہیں ہوتاتھا لیکن آج لائنیں لگی ہوئی ہیں ۔انہوں نے کہا کہ ایسا نہیں کہ نئے آنے والوں کی وجہ سے پرانے لوگ بھول جاتے ہیں ، پارٹی دیرینہ کارکنوں کو بھولی ہے اور نہ بھولے گی جب پارٹی اقتدار میں آئے گی تو آپ کو پوری طرح عزت دیں گے او رآپ کو پوزیشن دیں گے ۔