اسلام آباد (مانیٹرنگ ڈیسک) سری دیوی کے انتقال سے بھارت سوگ میں ڈوباہوا ہے ۔کپور خاندان کے قریبی ذرائع کا کہنا ہے کہ موت کے وقت بونی کپور اپنی اہلیہ سری دیوی کے پاس موجود تھے اور یہ سب کچھ ایک حیران کن اتفاق ثابت ہوا۔ سری دیوی سمیت کپور فیملی شادی کی تقریب میں شرکت کیلئے راس الخیمہ میں موجود تھی اور تقاریب ختم ہونے کے بعد بونی کپور اپنی بیٹی خوشی کپور کے ساتھ ممبئی واپس چلے گئے تھے۔ لیکن سری دیوی
نے دبئی میں ہی اپنی بہن سری لاتھا کیساتھ رہنے کا فیصلہ کیا۔ اگر سب کچھ شیڈول کے مطابق ہوتا تو سری دیوی کے انتقال کے وقت بونی کپور ممبئی میں ہوتے لیکن بونی کپور اس سے پہلے ہی دبئی آ گئے۔کپور فیملی کے قریبی ذرائع کے مطابق بونی کپور نے یہ سب کچھ سری دیوی کو سرپرائز دینے کیلئے کیا تھا لیکن انہیں کیا معلوم تھا کہ وہ اپنی اہلیہ سے آخری مرتبہ ملنے جا رہے ہیں اور اس کے بعد ان کی کبھی ملاقات نہیں ہوگی۔
