اسلام آباد(مانیٹرنگ ڈیسک) سری دیوی گزشتہ شب دبئی میں انتقال کرگئی ہیں ،ان کا جسد خاکی خصوصی طیارے کے ذریعے ممبئی منتقل کیاجائے گا، موت کی اطلاع ملتے ہی دبئی میں موجود ان کے مداح خراج عقیدت پیش کرنے کے لیے دبئی فارنزک سنٹر پر جمع ہوگئے ہیں۔عرب میڈیا کے مطابق دبئی میں موجود بھارتی سفارتخانے کے ذرائع نے بتایاکہ ایمریٹس ٹاور میں موجود ہوٹل کے کمرے میں سری دیوی گزشتہ شب گیارہ بجے انتقال کرگئیں ،
اطلاعات کے مطابق ہوٹل کے باتھ روم میں ہی سری دیوی کو دورہ پڑا جس پر انہیں فوری طورپر راشد ہسپتال منتقل کیاگیا ۔اس ضمن میں ہوٹل کی انتظامیہ نے کسی قسم کا موقف دینے سے انکار کردیا تاہم ایک ملازم کا کہناتھاکہ پولیس معاملے کی تفتیش کررہی ہے ۔بھارتی سفارتخانے کے ذرائع کے مطابق سری دیوی کو مردہ حالت میں ہسپتال پہنچایاگیا ۔واضح رہے کہ سری دیوی شادی میں شرکت کیلئے اپنے شوہر اور بیٹی کے ہمراہ دبئی گئی تھیں۔
