اسلام آباد(مانیٹرنگ ڈیسک)امریکی ریاست فلوریڈا کے سکول میں خون کی ہولی، فائرنگ سے 17افراد، بچے جاں بحق، درجنوں افراد زخمی۔ غیر ملکی میڈیا رپورٹس کے مطابق امریکی ریاست فلوریڈا کے سکول میں فائرنگ کے نتیجے میں 17افراد جاں بحق ہوگئے ہیں جن میں سکول کے بچے بھی شامل ہیں جبکہ درجنوں افراد زخمی ہیں۔ واقعہ فلوریڈا کی بروارڈ کائونٹی میں سٹون مین ڈگلس ہائی سکول میں پیش آیا۔
کائونٹی شیرفت سکاٹ اسرائیل نے صحافیوں کو بتایا ہے کہ سکول میں فائرنگ کرنے والے شخص کی شناخت 19 سالہ نکولوس کروز کے نام سے ہوئی ہے جو سکول کا سابق طالب ہے اور اسے غلط رویے پر سکول سے نکالا گیا تھا۔ ملزم نے فائرنگ کرنے سے پہلے فائر الام بجایا جس سے افراتفری پیدا ہوئی نکلولوس کروز نے ایک رائفل استعمال کیا اور ان کے پاس لاتعداد میگزینزتھے۔انہوں نے بتایا کہ ملزم نے سکول کے باہر سے فائرنگ کرنا شروع کی جہاں تین افراد ہلاک ہوئے۔ اس کے بعد وہ عمارت میں داخل ہوگیا اور مزید 12 افراد کو ہلاک کیا جبکہ دو افراد زخموں کی تاب نہ لاتے ہوئے ہسپتال میں دم توڑ گئے۔ پولیس نے اطلاع ملتے ہی سکول میں گھیرے میں لے لیا اور طالب علموں کو بحفاظت سکول سے نکالا۔ سکول کو غیر معینہ مدت کیلئے بند کر دیا گیا ہے۔سی سی این کے مطابق زخمیوں کو فوری طور پر ہسپتال منتقل کردیا گیا تاہم بیشتر کی حالات تشویش ناک ہے اور ہلاکتوں کی تعداد میں اضافہ متوقع ہے۔ایوری ٹاؤن فار گن سیفٹی کے مطابق یہ حملہ رواں سال کسی سکول یا اس کے قریب ہونے والا 18واں واقعہ ہے۔وسری جانب ریاست میری لینڈ میں نیشنل سیکورٹی ہیڈ کوارٹر کے باہر فائرنگ کا واقعہ پیش آیا ہے جس کے نتیجے میں سیکورٹی اہلکار اور ایک راہگیر زخمی ہو گئے ہیں۔ ایف بی آئی نے واقعہ کو عمارت میں داخلے کی کوشش کے دوران جھگڑے کا واقعہ بتایا ہے۔
