سرینگر/نئی دہلی(اے این این)مقبوضہ کشمیر میں بھارتی فوجی کیمپ پر ہفتہ کو مجاہدین کے حملے میں 10بھارتی فوجی ہلاک ہوئے ، بھارتی وزارت دفاع نے ہلاکتوں کی تصدیق کردی ۔غیر ملکی خبررساں ادارے کو بھارتی وزارت دفاع نے تصدیق کرتے ہوئے بتایا کہ چار مسلح افراد ہفتہ 10 فروری کو علی الصبح جموں شہر کے مضافات میں واقع بھارتی فوج کے ایک انفنٹری کیمپ میں داخل ہو ئے اور داخل ہوتے ہی اندھا دھند فائرنگ شروع کردی جس کے نتیجے میں 10بھارتی فوجی ہلاک ہو گئے ۔

وزارت خارجہ کے ترجمان راجیش کالیا کے مطابق ان چاروں حملہ آوروں کو بھی مار دیا گیا اور علاقے میں حملہ آوروں کے ممکنہ ساتھیوں کی تلاش کا آپریشن تاحال جاری ہے۔وزرات خارجہ کے بیان کے مطابق کم از کم حملہ آوروں اور بھارتی فوجیوں کے درمیان فائرنگ کے تبادلے کے نتیجے میں کم از کم 11 افراد زخمی بھی ہوئے جن میں پانچ خواتین اور تین بچے شامل ہیں۔ ہلاک ہونے والا سویلین شخص ایک فوجی کا والد تھا۔بھارتی میڈیا کے مطابق حملہ آور مذکورہ کیمپ کے عقبی جانب سے داخل ہوئے اور اس کے رہائشی علاقے تک پہنچ گئے۔ راجیش کالیا کے مطابق حملہ آوروں کو چھوٹے سے علاقے تک محدود رکھنے اور اس علاقے سے فوجیوں کے خاندانوں کو نکالنے کی کوشش کے باعث یہ آپریشن 24 گھنٹے سے زائد وقت تک جاری رہا۔ واضح رہے کہ یہ پہلا موقع نہیں ہے کہ سنجوان فوجی کیمپ پر حملہ کیا گیا ہے۔ اس سے قبل دو خودکش حملہ آوروں نے 2006 میں اس کیمپ پر حملہ کیا تھا جس کے نتیجے میں 12 فوجی ہلاک گئے تھے۔