لاہور(مانیٹرنگ ڈیسک) وزیراعلیٰ پنجاب شہباز شریف صاف پانی سے متعلق ازخود نوٹس کی سماعت کے سلسلے میں سپریم کورٹ لاہور رجسٹری پہنچ گئے۔چیف جسٹس آف پاکستان جسٹس میاں ثاقب نثار کی سربراہی میں سپریم کورٹ لاہور رجسٹری میں صاف پانی سے متعلق ازخود نوٹس کی سماعت اب سے کچھ دیر بعد ہوگی۔وزیراعلیٰ کی پیشی کے موقع پر سیکیورٹی کے انتہائی سخت اقدامات کیے گئے، وزیراعلیٰ شہباز شریف کی آمد سے

قبل صوبائی وزیر قانون رانا ثناءاللہ، بیگم ذکیہ شاہنواز، خواجہ احمد حسان، چیف سیکریٹری پنجاب، آئی جی اور دیگر اعلیٰ افسران سپریم کورٹ لاہور رجسٹری پہنچے۔گزشتہ روز سماعت کے دوران دریائے راوی میں 540 ملین گندہ پانی پھینکے جانے کے انکشاف کے بعد چیف جسٹس نے وزیراعلیٰ پنجاب کو طلب کیا تھا۔سماعت کے دوران عدالتی معاون عائشہ حامد نے دریائے راوی میں گندا پانی پھینکے جانے سے متعلق رپورٹ عدالت میں پیش کی تھی۔چیف جسٹس نے ریمارکس دیئے کہ ‘شہباز شریف وضاحت پیش کریں کہ گندے پانی کی نکاسی کے لیے کیا اقدامات کیے جا رہے ہی،لاہور تو پنجاب کا دل ہے، اس کے ساتھ کیا سلوک کیا جا رہا ہے’۔جسٹس ثاقب نثار کا مزید کہنا تھا کہ ‘حیرانگی کی بات ہے کہ لاہور کی یہ صورتحال ہے تو باقی شہروں کی کیا ہوگی، آلودگی کے معاملے پر وزیراعلیٰ سندھ کو طلب کر سکتے ہیں تو وزیراعلیٰ پنجاب کو کیوں نہیں’۔