ممبئی (شوبزڈسک)بالی ووڈ اداکارہ جیا خان کی خودکشی کے ساڑھے 4 سال بعد ان کے سابق دوست سورج پنچولی پر فردجرم عائد کردی گئی ہے۔ بھارتی میڈیا کی ایک رپورٹ کے مطابق سورج پنچولی نے فرد جرم کی تردید کی اور اب 17 فروری سے مقدمے کی سماعت شروع ہوگی۔اداکار کے وکیل پرشانت پٹیل نے بتایا ‘سورج نے بے گناہی پر اصرار کیا اور گواہوں پر جرح کا آغاز 14 فروری کو ہوگا’۔خیال رہے کہ جیا خان نے 2013 میں خود کو پھندا لگا کر خودکشی کرلی تھی
اور اپنے آخری خط میں سورج پنچولی پر زندگی تباہ کرنے کا الزام عائد کیا تھا۔سورج پنچولی کے والد آدتیہ پنچولی نے اس حوالے سے میڈیا کو بتایا کہ ان کے خاندان کو یہ جان کر سکون ملا ہے کہ ٹرائل آگے بڑھ رہا ہے۔ انہوں نے خوشی کا اظہار کیا انکا کہنا تھا کہ ہم ساڑھے چار سال سے اس دن کا انتظار کر رہے تھے اب حقیقی ٹرائل شروع ہو رہا ہے۔۔سورج اگر قصوروار ہیں تو ان کو ضرور سزا دی جائے گی لیکن اگر وہ بے گناہ ہیں تو انہیں تمام الزامات سے بری کیا جائے گا ۔
