میں آپ کو سب سے پہلے چند لمحوں کیلئے ماضی میں لے جانا چاہتا ہوں‘ پاکستان تحریک انصاف کے وائس چیئرمین شاہ محمود قریشی نے 3 ستمبر 2014ء کو قومی اسمبلی سے خطاب کرتے ہوئے جوکہا تھااور عمران خان نے کل اور آج جوکہا (لعنت/ لعنت بڑا‘ چھوٹا لفظ) آج قومی اسمبلی میں عمران خان اور شیخ رشید کے عمل پر یہ ردعمل سامنے آیا، قومی اسمبلی نے عمران خان اور شیخ رشید کے خلاف متفقہ قرارداد بھی پاس کردی۔

کل جو کچھ ہوا وہ انتہائی قابل مذمت اور افسوس ناک تھا‘ قوم کو شیخ رشید سے کوئی توقع نہیں تھی‘ یہ ایک احسان فراموش اور تھالی میں چھید کرنے والے انسان ہیں‘ یہ سات بار اس ایوان کا حصہ رہے‘ اس ایوان نے انہیں پانچ مرتبہ وزیر بھی بنایا اور یہ23ویں ترمیم تک ملک کی ہر بڑی ترمیم کا حصہ بھی رہے لیکن آپ ان کے کریکٹر کا خلاء ملاحظہ کیجئے‘ یہ اسی ایوان کو گالی دے رہے ہیں جو انہیں پوری زندگی عزت دیتا رہا‘ قوم انہیں اچھی طرح جانتی ہے لہٰذا قوم کو ان کے الفاظ پر کوئی ملال نہیں تھا‘ شیخ رشید کی پوری پارٹی سائیکل کی ایک سیٹ پر آ جاتی ہے لیکن قوم کو عمران خان سے یہ توقع نہیں تھی‘ ملک میں بڑی مشکل سے روایتی جماعتوں کے مقابلے پر ایک تیسری جماعت سامنے آئی تھی‘ قوم کا خیال تھا یہ جماعت ہر لحاظ سے پچھلی جماعتوں سے بہتر ثابت ہو گی لیکن عمران خان نے شیخ رشید کے پیچھے سیاسی نماز پڑھ کر پوری قوم کو شرمندہ کر دیا‘ انہوں نے الفاظ کے غلط چناؤ کی وجہ سے مرتی ہوئی روایتی جماعتوں کو دوبارہ زندہ کر دیا‘انہوں نے لوگوں کے دلوں میں نواز شریف اور آصف علی زرداری کیلئے ہمدردی پیدا کر دی‘ انہوں نے ثابت کر دیا پچھلے کفن چور نئے چوروں سے بہتر ہیں‘ عمران خان کو آج یہ فیصلہ کرنا ہے یہ شاہ محمود قریشی کی طرح قومی اسمبلی کو قبلہ سمجھتے ہیں یا پھر یہ اس کو واقعی لعنت کے قابل سمجھتے ہیں‘ آپ کا یہ فیصلہ آپ اور قوم دونوں کیلئے بہتر ہوگا۔ کل کی دو تقریروں کی وجہ سے متحدہ اپوزیشن اب متحدہ نہیں رہی‘ پیپلز پارٹی اب عمران خان کے ساتھ کوئی سٹیج شیئر نہیں کرے گی‘ کیا یہ دو تقریریں علامہ صاحب کے موقف کو بھی بہا لے گئی ہیں‘ علامہ صاحب کا نام ای سی ایل پر آ گیا‘ اس سے کیا فرق پڑے گا اور قومی اسمبلی نے مذمتی قرارداد پاس کر دی‘ یہ قرارداد کس کا کیا بگاڑ لے گی‘ یہ ہمارے آج کے ایشوز ہوں گے‘ آپ ہمارے ساتھ رہیے گا۔