اسلام آباد(نیوز ڈیسک)پاکستان نے امریکی ڈرون حملے کے نتیجے میں امریکی اور اطالوی مغوی باشندوں کی ہلاکت پر دکھ اورافسوس کا اظہار کرتے ہوئے غمزدہ خاندانوں سے اظہار ہمدردی کیا۔جمعہ کے روز دفتر خارجہ سے جاری ایک بیان میں ترجمان دفتر خارجہ تسنیم اسلم نے کہا ہے کہ پاکستان ایک طویل عرصہ سے ڈرون حملوں کی مخالفت کررہا ہے ان ڈرون حملوں میں صرف دہشت گردوں کو نشانہ نہیں بنایا جاتا بلکہ معصوم اور بے گناہ لوگ بھی مارے جارہے ہیں،گزشتہ روز ڈرون حملوں میں امریکی اور اطالوی مغوی باشندوں کی ہلاکت ڈرون ٹیکنالوجی کے غیر محفوظ استعمال کا نتیجہ ہے، اس ٹیکنالوجی کے استعمال سے کئی بے گناہ شہری مارے جا چکے ہیں،ایسے ڈرون حملے نہیں ہونے چاہئیں جن سے بے گناہ افراد کو اپنی جان گنوا بیٹھیں،پاکستان دہشت گردی کی جنگ میں ہزاروں جانوں کا نقصان اٹھا چکا ہے ،ڈرون حملوں کے نتیجے میں مزید دہشت گردی پروان چڑھ رہی ہے،ڈرون ٹیکنالوجی اگر پاکستان کو فراہم کی جائے تو آسانی کے ساتھ صرف دہشت گردوں کو نشانہ بنایا جا سکتا ہے اوران حملوںمیں بے گناہ افراد کو بچایا جا سکتا ہے،امریکی مغوی باشندے وٹسن اور لوپوٹو کی ہلاکت پر پاکستانی حکومت اظہار افسوس کرتی ہے اور لواحقین کے ساتھ دکھ کے برابر کے شریک ہیں۔