اسلام آباد (مانیٹرنگ ڈیسک) وزیراعلیٰ پنجاب میاں شہباز شریف کی سعودی عرب روانگی کے بعد میاں نواز شریف نے بھی عمرہ ادائیگی کے بہانے سعودی عرب جانے کا فیصلہ کیا ہے۔ دونوں بھائیوں اور ترکی کے وزیراعظم علی بن یلدرم کی سعودی عرب میں موجودگی نے ایک نئے این آر او کی خبروں کو تقویت دیدی ہے۔ باخبر ذرائع کے مطابق وزیراعلیٰ پنجاب میاں شہباز شریف نے سعودی عرب میں سعودی حکمرانوں اور ترکی کے

وزیراعظم علی بن یلدرم سے ملاقاتوں کے بعد میاں نواز شریف کو سعودی عرب فوری طور پر پہنچنے کیلئے گرین سگنل دیدیا ہے۔میاں نواز شریف بھی اگلے اڑتالیس گھنٹوں میں سعودی عرب روانگی کا ارادہ کرچکے ہیں بظاہر میاں نواز شریف عمرہ ادائیگی کا ایجنڈا لیکر جارہے ہیں لیکن میاں شہباز شریف نے سعودی حکمرانوں سے میاں نواز شریف کی ملاقاتوں کا شیڈول مرتب کرلیا ہے۔ دونوں بھائیوں کی سعودی عرب میں بیک وقت موجودگی نے ان خبروں کو مزید تقویت دیدی ہے جن میں کہا جارہا ہے کہ 2000 ء کی طرح میاں نواز شریف ایک بار پھر سعودی حکومت کے ذریعے پاکستانی اسٹیبلشمنٹ سے این آر او کرنے کیلئے جارہے ہیں۔ میاں نواز شریف احتساب عدالتوں کے فیصلے آنے سے پہلے سعودی حکومت کے ذریعے ایک ایسا نیا سیاسی معاہدہ کرنے کی کوشش کر رہے ہیں جس کے ذریعے کم از کم مریم نواز کا سیاسی مستقبل تاریک ہونے سے بچ جائے۔ میاں نواز شریف کا سیاسی کیرئیر بچانے کیلئے ترکی کی حکومت بھی بھرپور طریقے سے متحرک ہے۔ پیپلز پارٹی کے راہنما نبیل گبول نے گزشتہ روز اس بات کی تصدیق کی ہے کہ میاں نواز شریف اور میاں شہباز شریف کی سعودی عرب میں موجودگی ایک نئے این آر او کیلئے بھرپور کوشش ہے۔ میاں شہباز شریف نے راستے صاف کرنے کے بعد ہی بھائی کو سعودی عرب پہنچنے کا پیغام دیا ہے۔

موضوعات:نواز شریف